Биыл Жарма ауданының Жарық, Қызылағаш ауылдарында ұялы байланыс және интернет желісінің антеннасы орнатылып жатыр.
А.ӘБІЛ,
«Semei tany»
Жарық ауылында мердігер «LLC ASIA» ЖШС ұйымы болса, Қызылағаш ауылында жобаны жүзеге асырушы мердігер — «Теплоэнергострой» ЖШС ұйымы. Қазіргі таңда байланыс жабдығының негізгі құрылымын көтеру жұмыстары жүргізілуде.
Ұялы байланыс операторларының міндеттемелеріне сәйкес, 2021-2025 жылдар аралығында Жарма ауданының Балықтыкөл, Жайма, Белтерек, Салқынтөбе, Жарық, Қызылағаш, 8 Март, Ортабұлақ, Қаражал, Егінбұлақ, Үкілі, Шымылдық және Терістаңбалы ауылдық елді мекендері кең жолақты интернет желісімен қамтамасыз етіледі деп жоспарланған.
Қазіргі таңда Қалбатау, Жаңаөзен, Қапай батыр ауылдары, сондай-ақ Әуезов, Жаңғызтөбе кенті «Қазақтелеком» АҚ арқылы, Шар қаласы мен Шуақ, Жарма, Қапанбұлақ, Аршалы, Үшбиік, Шалабай, Суықбұлақ, Балықтыкөл, Салқынтөбе, Шуақ, Бірлік және Қаражал елді мекендері «Транстелеком» АҚ арқылы интернет желісімен қамтамасыз етілген.
Айта кетерлігі, жыл басынан бері Жарма ауданының жергілікті атқарушы органдары тарапынан 13110 мемлекеттік қызмет көрсетілді. Оның ішінде мемлекеттік орган арқылы 576, мемлекеттік корпорация арқылы 966, «Электрондық үкімет» веб-порталы арқылы 8601 және «Е-лицензиялау» МДҚ АЖ арқылы 947 қызмет көрсетілді. Қызмет берушінің ақпараттық жүйесі арқылы қызмет алушылармен тікелей байланыссыз және тікелей байланыс арқылы ақпараттық жүйеге өтінімді қолмен енгізу жолымен 2020 қызмет көрсетілген.
