Биыл Ұлттық валютамыз — төл теңгенің айналымға енгеніне 30 жыл толып отыр. 15 қараша күні еліміздегі қаржы саласы мамандары да кәсіби мерекелерін атап өтеді.
Әлібек КЕМЕЛХАН,
«Semei tany»
Бүгінде облыс орталығында екінші деңгейлі 12 банктің филиалы мен 47 валюта айырбастау пункті тұрғындарға қызмет көрсетуде. Еліміздің экономикалық қуаты, тұрғындардың әлеуметтік жағдайы қаржы саласындағы қызметкерлердің еңбегіне де тікелей байланысты. Мемлекетіміздің жетістіктеріне Семей қаласындағы қаржы саласы қызметкерлерінің де қосып отырған үлесі зор. Бұл күн — қаржыгерлер үшін де аса маңызды, айрықша қадірлі күн.
Мерекеге орай Семей қалалық мәдениет сарайында салтанатты шара болып өтті. Мерекелік басқосуға өңіріміздіңі қаржы саласында еселі еңбек етіп жүрген мамандар мен ардагерлер қауымы жиналды.
Жиын барысында Семей қаласының әкімі Нұрбол Нұрсағатов құттықтау сөз сөйлеп, қаржы саласы мамандарының еселі еңбектері жайлы жылы лебіз білдірді.
— Сіздерді Қазақстан Республикасының Ұлттық валютасы — теңге күнімен және Қаржы жүйесі қызметкерлерінің кәсіби мерекесімен құттықтаймын! Биыл төл теңгеміздің айналымға енгеніне тұп-тура 30 жыл толып отыр. Еліміздің экономикалық қуатын еселеп, тұрғындардың әлеуметтік жағдайын арттыру қаржы саласындағы жемісті еңбекпен тікелей байланысты. Бұл жетістіктерге семейлік қаржы саласы қызметкерлерінің де қосқан үлесі аз емес. Тәуелсіздік туы астындағы 32 жыл ішінде Семей қаласы дамудың талай белесін артқа тастап, қиындықтарды жеңіп, жылдан-жылға көркейіп келеді.
Өнеркәсіп өнімінің көлемі соңғы бір жарым жылда 1,5 млрд теңгеге көбейіп, қала бюджетінің көлемі анағұрлым артты. Сіздер, қаржыгерлер, қаламыздың қаржы-қаражат саясатын іске асыруда қанатымен су сепкен қарлығаштай ел игілігі үшін тер төгіп, аянбай қызмет етіп келесіздер. Сол себепті бұл күнді қаржыгерлер үшін айрықша қадірлі күн деп білемін. Қадірлі қаржыгерлер, осындай айтулы мереке күні отбасыларыңызға амандық, дендеріңізге саулық, еңбектеріңізге табыс, істеріңізге сәттілік тілеймін. Тәуелсіздігіміз де, теңгеміз де тұғырлы болсын, — деді қала әкімі.
Жиында төл теңгеміздің 30 жылдық тарихынан сыр шертіліп, ел экономикасын нығайтудағы маңыздылығы жайлы сөз қозғалды.
Мерекелік салтанатта қаржы саласыда жемісті еңбек етіп, абыройға бөленіп жүрген бірқатар қызметкерлер марапатталды. Атап айтсақ, Гүлфайрус Серікболова, Мария Осадчая және Әлия Сарбаевалар Қазақстан Республикасы Қаржы министрлігінің «Қаржы қызметінің үздігі» төсбелгісін иеленді.
Ал Семей қаласы әкімінің Құрмет грамотасы жемісті еңбегі, қаржы жүйесіне қосқан үлесі үшін және Гүлмира Акрамова, Лидия Луковенко, Айгүл Емиргазинова, Гүлзара Масакова, Қарақат Абдуалиева, Бәтіш Есендікова сынды майталман мамандарға берілді.
Қазақстан Республикасының Ұлттық Банкі Төрағасының «Теңгеге 30 жыл» мерекелік медалімен қаржы жүйесін дамытуға және теңгенің қалыптасуына қосқан үлесі үшін Бақыт Әйтікенова, Күлзия Базарбаева, Кургамал Балбекова, Валентина Еремина, Зейнулла Жидебаев, Рысқайша Карбекова, Орынжан Өмірғалина және Нұрбәтима Оразалинова мен Валентина Кривицкая марапатталды.
Жалпы, бұл күні еліміздің қаржы жүйесін дамытуға және нығайтуға елеулі үлес қосқан және тәуелсіздіктің алғашқы қиын кезеңінде аянбай еңбек еткен қаламыздағы банк саласының қызметкерлері де Ұлттық банктің Абай облысындағы филиалы атынан қошеметке кенелді.
Салтанатты жиынның ресми бөлімінен соң қалалық мәдениет үйінің өнерпаздары әзірлеген мерекелік концерттік бағдарламаға кезек беріліп, сала қызметкерлерінің құрметіне әсем ән әуелеп, күй күмбірледі.
