Қазақстан Республикасының Президенті Қасым-Жомарт Тоқаев өзінің «Әділетті Қазақстан: бәріміз және әрқайсымыз үшін. Қазір және әрдайым» деп аталатын сайлауалды бағдарламасында ауыл шаруашылығын өркендету мәселесіне ерекше тоқталған болатын. Астық мол, төрт түлік ырысты болу үшін ауыл шаруашылығына жағдай жасау маңызды.
Қуаныш ЖОЛЫМБЕТ,
«Semei tany»
Өткен жылдың осы кезеңімен салыстырсақ, аймағымызда ауыл шаруашылығы өнімдерін өндіру барысында ілгерлеушілік көп.
Нақты мысалдарға жүгінсек, бүгінде облыстағы ауыл шаруашылығы тауарын өндірушілер мен қайта өңдеу кәсіпорындары 33,3 мың тонна сиыр етін, 14,3 мың тонна құс етін, 53,7 млн дана жұмыртқа, 168,6 мың тонна картоп, 21 мың тонна сәбіз, 3 мың тонна пияз, 23,3 мың тонна қырыққабат, 103,3 мың тонна өсімдік майы, 57,7 мың тонна ұн, 7,1 мың тонна нан және 2,5 мың тонна макарон өнімін өндірді.
Етті мал шаруашылығын дамыту мақсатында облыс көлемінде 39 бордақылау алаңы жұмыс істейді. Оның 11-і 22 мың бас малды бордақылауға қуатты.
Өңірде жобалық қуаттылығы жылына 18 мың тонна болатын сүт өңдейтін 7 кәсіпорын бар.
Қазіргі күні тұрғындардың азық-түлікке деген сұранысын қамтамасыз ету мақсатында агроөнеркәсіптік кешеннің барлық салаларын дамыту және ауыл шаруашылығы өнімдерін өндіру мен өңдеу көлемін ұлғайту бағытында шаралар қабылданып жатыр.
Бұл орайда алға қойған жоспарлар ауқымды. Мысалы, 2023-2024 жылдары облыста ет комбинаттарын салу жобалары қарастырылуда. Мәселен, Семей қаласында жылдық қуаттылығы 12 600 тонна ет өңдейтін «Евразия Агро Семей» ЖШС-нің құрылысын бастау жоспарланған. Қазір аталған жоба мемлекеттік сараптамадан өтіп жатыр. Жобаға сәйкес құрылыс жұмысы 2025 жылы аяқталып, пайдалануға беріледі. Сонымен қатар 2024 жылы қуаттылығы жылына 600 тонна дайын өнім шығаратын «Ықылас Инвест» ЖШС ет консерві зауытын ашу көзделген.
Ауыл шаруашылығын өркендету жұмысын қуатты техникаларсыз жүзеге асыру мүмкін емес. Биыл облыста ауыл шаруашылығы техникалары 25 пайызға жаңартылды.
2023 жылға агроөнеркәсіптік кешен субъектілеріне несие беру, сондай-ақ ауыл шаруашылығы жануарларын, техника мен технологиялық жабдықтарды сатып алуға лизинг кезінде сыйақы мөлшерлемелерін субсидиялауға 2,7 млрд теңге бөлінді. Қазіргі таңда 2,6 млрд теңге игерілді.
2 700 субсидиялау шартына сәйкес 1 400-ден астам ауыл шаруашылығы тауар өндірушілері субсидияланды. Негізгі бағыттар лизингке сатып алынған ауыл шаруашылығы техникасы мен жабдығының сыйақы мөлшерлемелерін субсидиялау, сондай-ақ несиеге мал сатып алу болып табылады.
2023 жылы жалпы сомасы 11 миллиард теңгеден астам сомаға 550-ден астам жаңа ауыл шаруашылығы техникасы сатып алынды, бұл ауыл шаруашылығындағы машина-трактор паркі мен құрал-жабдықтарды 25 пайызға жаңартуға ықпал етті.
«Аграрлық несие корпорациясы» АҚ Абай облысының филиалы жыл басынан бері мал шаруашылығын дамыту мақсатында ауыл шаруашылығы тауар өндірушілерін жалпы сомасы 4,1 млрд теңгеге қаржыландырды. Оның ішінде 1,7 млрд теңге тікелей қаржыландыру және 2,4 млрд теңге несие серіктестіктері арқылы жүзеге асырылды.
Биыл қосымша бюджет қаражаты түскеннен кейін қазіргі таңда резервте тұрған 470 ұсыныс бойынша субсидиялау туралы келісімге қол қойылады.
