Бүгінде мемлекеттік қызметшілер арасында, әсіресе ішкі істер органдарында қызмет ететін көп балалы аналар көп емес. Десек те, темірдей тәртіп пен мызғымас ережеге негізделген қызметте жүріп, дүниеге перзенттер әкеліп, ұрпақ тәрбиесін қоса алып жүрген погонды нәзік жандылардың қатары артып келеді. Олардың қатарында полиция майоры Райхан Ешимова да бар.
Азамат ЕРСАЙЫН,
«Semei tany»
Жуырда Семей қалалық әкімдігінде батыр аналарды марапаттауға арналған кезекті жиын өтті. Салтанатты іс-шараға өңірімізге қарасты елді мекендер мен Семей қаласындағы көп балалы аналар жиналды. Әр салада еңбек етіп жүрген жандарды шаһар әкімі Нұрбол Нұрсағатов құттықтап, «Алтын алқаларын» салтанатты түрде тапсырды. «Алтын алқа» төсбелгісіне жеті бала тәрбиелеп отырған Семей қаласы полиция басқармасы орталық бөлімінің аға тергеушісі полиция майоры Райхан Ешимова да ие болды.
Айта кетсек, бүгінде жұбайымен бірге үш ұл және төрт қыз тәрбиелеп отырған полиция майоры Райхан Ешимова өткен жылы ғана «Күміс алқа» иегері атанған.
Райхан Ешимова 1988 жылы Оңтүстік Қазақстан облысы Мақтарал ауданы Мырзакент кентінде полиция қызметкерлерінің отбасында дүниеге келіпті. Жоғары сыныптарда заңгер мамандығын алып, тергеуші болуға шешім қабылдаған екен. Арманына қол жеткізу үшін орта мектепті бітіргеннен кейін Қазақстан Республикасы ІІМ Алматы академиясына оқуға түсіп, 2009 жылы ведомстволық оқу орнын бітіріп шығады. Жас курсант Семей қаласына жіберіліп, орталық полиция бөлімінің тергеушісі лауазымына тағайындалады.
Бүгінде бала кезінен армандаған мамандығы бойынша 13 жылдай еңбек өтілі бар екен. Ал жұбайымен академия қабырғасында танысып, көңіл жарастырыпты. Отағасы Айдын Ешимов — бүгінде жеке кәсіпкер. Мектеп жасындағы балалары өте белсенді. Қыздары көркем гимнастика, ұлдары шығыс жекпе-жектері бойынша түрлі марапат иелері, көптеген байқауларға қатысып, жүлделі орындар алып жүр. Сонымен қатар Семей қаласының білім беру бөлімінің және полиция басқармасының, Семей қалалық полиция бөлімі басшыларының қолынан алған мақтау қағаздары бар.
Райхан, негізінен, мүліктік қылмыстық құқық бұзушылықтарға қатысты қылмыстық істерді жүргізеді. Еңбегі абыройлы, ұжымда құрметке ие. Ішкі істер органдарына қызметке жаңадан кірген жастарға мамандықтың қыры мен сырын үйретіп, өз тәжірибесін бөлісіп отырады.
– Мамандығым байланыстырған әрбір адамға мен жан дүние көзімен, түсіністікпен қарауға тырысамын. Менің ойымша, тергеуші адам тағдырына бейжай қарамауы тиіс, бұл — біздің мамандығымыздың мәні, — дейді бұл орайда Райхан Ешимова.
Бүгінде отбасын жан жылуына бөлеп отырған бақытты ана Райхан мен жұбайы бос уақыттарын балаларына арнайды. Оңтүстіктің, қазақы ауылдың қызы болғандықтан да шаруаға мығым. Отбасын қызметпен қатар алып келеді.
– Таңертеңгі уақытта жұмысқа қалай асықсам, жұмыстан кейін үйге де дәл солай асығамын. Отбасының жылуына еш нәрсе жетпейді. Балаларымның жанында болған сәттерде қызмет барысындағы барлық қиындықтар ұмыт болады. Перзенттеріме мүмкіндігінше көп уақыт пен көңіл бөлгім келеді. Өзіндік ауыртпашылығы, жауапкершілігі бар қызметім бұған еш қиындық тудырмайды. Мен өзімнің кәсіби қызметімді тергеумен байланыстырғаныма еш өкінбеймін. Өзімді отбасылық өмірде де, қызметте де жолы болған бақытты жанмын деп санаймын, — дейді тергеуші.
