Ерзат ЖАНАТҰЛЫ,
«Семей таңы»
Семей қаласының 2014 – 2016 жылдарға арналған бюджеті, Семей қаласы мәслихатының 2014 жылға арналған жұмыс жоспары, қалалық мәслихаттың құқықтық мәселелер, депутаттық этика және өкілеттіктер жөніндегі тұрақты комиссияның есебі, Семей қаласында мемлекеттік жастар саясатын жүзеге асыру сияқты мәселелер Семей қалалық мәслихатының кезекті жиырма алтыншы сессиясында қаралды. Сондай – ақ, халық қалаулылары қаладағы жолаушы тасымалымен айналысатын автобустардағы жолаушы және жүк тасымалдаудағы бірыңғай тарифті келісу, төтенше жағдайлардың алдын алу мен болдырмау жөніндегі қалалық комиссияның дербес құрамы, Семей қаласының 2011 – 2015 жылдарға арналған даму бағдарламасын бекіту туралы 2010 жылғы 29 желтоқсандағы шешімге өзгерістер енгізу сияқты мәселелерге де назар аударды. Сессия жұмысына қала басшысы Айбек Кәрімов, Семей қаласы әкімінің орынбасарлары Жағыпарбек Елубаев, Зәуреш Исабаева және құқық қорғау органдарының басшылары қатысты.
Семей қалалық экономика және бюджеттік жоспарлау бөлімі басшысының орынбасары Сәулет Кенжебеков депутаттар алдында Семей қаласының 2014 – 2016 жылдарға арналған бюджеті туралы есебін баяндады. Естеріңізде болар, жақында таныстырылып, таразыланған Семей қаласының жаңадан түзілген экономикалық моделі де 2014 – 2016 жылдарға арналған. Демек, екі жылдық бюджет пен модель Семей қаласының әлеуметтік – экономикалық тұрғыдан өсуі мен өркендеуіне, дамуына екі жақтап ықпалын тигізері анық. Айта кету керек, қала бюджетінің жобасы облыстық және республикалық бюджет есебінен бөлінетін трансферттер мен несиелерді есепке ала отырып құрылған.
Сәулет Мұратұлының айтуынша, 2014 – 2016 жылдарға жобаланған бюджет қаражаты есебінен құрылыс саласына, қаланы жылумен қамту жұмыстарын әрі қарай жалғастыру, кәріз жүйелерін ретке келтіру, инженерлік желілер мен коммуникациялық инфрақұрылымдарды жаңғырту, жылу энергетикалық жүйені дамыту, мемлекеттік бағдарламаларды орындау, бірқатар әлеуметтік нысандардың жобалық – сметалық құжатын әзірлеу, Семей өңіріне қарасты ауылды жерлерді сумен қамтамасыз ету жұмыстары жүзеге асады. Сондай – ақ білім саласына, әлеуметтік мәселелерге де бюджет жобасында мән берілген.
Қала бюджетінің кіріс бөлігі жыл сайын қарқынмен өсуде. Биылғы бюджетте де көңіл қуантарлық кіріс бар. Сәулет Мұратұлы атап өткендей, 2016 жылы меншікті кіріс көзі 17 млрд. теңгенің үстінде болады деп күтілуде. Ал, бюджеттің өсімі шаһардың жан – жақты дамуының басты кепілі.
Әлбетте, бюджеттің жыл сайынғы тұрақты өсімі қала билігінің белсенді, салық басқармасының кешенді жұмысының нәтижесінде жүзеге асқаны анық.
Айбек Кәрімов биылғы бюджеттің меншікті кіріс бөлігі 12 млрд. теңгенің үстінде болғандығын халық қалаулылары алдында атап өтті. Өткен жылмен салыстырғанда 2 млрд. теңге көлемінде өсім байқалып, 2010 жылдың бюджетінің кіріс көзімен таразыласақ, 90 пайызға өскен. Яғни, соңғы төрт жылда біздегі бюджеттің кіріс бөлігі екі есеге жуық ұлғайған. Иә. Ауыз толтырып айтар көрсеткіш екені жасырын емес.
-Жеке табыс көздері арқылы қала қазынасын толықтыру үшін өндірістік саланы дамытуға айрықша көңіл бөлу керек. Бүгінгі таңда тиімді табыс көзін ашып, өндірісті жан – жақты дамытуға мүдделі болуымыз қажет. Жасыратыны жоқ, жасырын кіріс көздері бізде әлі де бар. Әсіресе, сауда саттық пен кәсіпкерлікті алып қарасаңыздар, жасырын сауда жүйесін көруге болады. Тауар айналымдарының көрсеткіштері нақты көрсетілмейді. Салықтан жалтарып жүргендері де көп. Жолаушылар тасымалымен айналысатын мекемелер де нақты табыс көзін көрсетпейді. Міне, осы аталған мәселелерді көтеруіміз керек. Қаланың қазынасына келіп түсетін қаражаттың негізігі бөлігін осылар да құрауы тиіс. Осы ретте біз бірлесіп жұмыс жасағанымыз жөн, — деп атап өтті Айбек Мүталапханұлы сессияда.
Халық қалаулылары Семей қаласындағы мемлекеттік жастар саясатын жүзеге асыру туралы ішкі саясат бөлімі басшысы Ғалия Смайлованың есебін де тыңдады. 2020 жылға дейін мемлекеттік жастар саясатын жүзеге асыру бағдарламасы негізінде шаһарда бірқатар кешенді жұмыстар атқарылып келе жатыр. Жастардың бос уақытын тиімді өткізу мен қоғамдық белсенділігін арт-тыруда «Жастар орталығы» құрылып, бұл күнде жемісті жұмыс атқаруда. Жастар ұйымдары да осы орталықтың негізінде қалада өтетін іс – шаралардан қалыс қалмайды. Патриоттық форумдар, танымдық іс – шаралар өткізуде жастар қауымы қозғаушы күшке айналып, белсенділіктері артып келеді. Қазір Семей өңірі бойынша 90 мыңға жуық жастар бар. Бұл қала тұрғындарының 27 пайызын қамтиды. Биылдың өзінде жастар саясатын дамытуға 17 млн. теңге көлемінде қаражат бөлінген. Осыдан – ақ қала жастарына деген атқарушы биліктің сенімін айқын аңғаруға болады. Жастар ақылгөй ақсақалдармен, қазыналы қарттармен, аға буын өкілдерімен кездесуді де дәстүрге айналдырған. Жұмысқа орналасу, жұмыссыз жүргендеріне қайта білім алу арқылы кәсіпке баулу, жастарды баспанамен қамтамасыз ету, студенттерді жатақханамен қамту сияқты мәселелер күн тәртібінде. Бұл ретте ЖОО және орта арнаулы білім ошақтары басшылары да бірқатар жұ-мыстар атқаруда.
Депутат Бейсенғазы Тастекеев осындай жиындардан, патриоттық форумдардан ауыл жастарының тыс қалатындығын атап өтті. Әсіресе, қаладан шалғай жатқан ауыл жастарын осындай танымдық, тәрбиелік маңызды басқосулардан қалдырмау керектігі жайындағы өз ойымен бөлісті.
Қала әкімі қазір жастар мен аға буынның арасындағы алтын көпірдің үзіліп қалғандығын жеткізді. Айбек Мүталапханұлы халық қалаулыларына мемлекеттік істерге, жауапты жұмыстарға, ұйымдастырушылық қабілеті жоғары, жалынды, іскер жастарды тәрбиелеуге мән беруге шақырып, өздерінің кәсіпорындары мен мекемелерінде бір жұмыс орындарын ашуға ұсыныс тастады.
Қала ішінде автобустармен жолаушыларды тасу және жүк тасымалдау бағытында бірыңғай тарифті келісу туралы сұрақ төңірегінде депутаттардың айтары көп екен. Осыған орай Айбек Кәрімов мәселенің маңыздылығына және жолаушы тасымалымен айналысатын кейбір мекемелердің қарама – қайшылықтарына байланысты мұны алдағы мәслихат сессиясында жеке талқылауға ұсыныс білдірді. Қала басшысы осы жерде қалада мемлекеттік коммуналдық жолаушылар тасымалымен айналысатын кәсіпорын құру туралы ұсынысын ашық жеткізді. Жылқы жылы халық қалаулылары сессияның алғашқы отырыстарының бірінде қаладағы жолаушылар тасымалын жан – жақты талқылауды көздеп отыр.
Сессия соңында депутаттар қалалық мәслихаттың құқықтық мәселелер, депутаттық этика және өкілеттіктер жөніндегі тұрақты комиссияның есебін, төтенше жағдайлардың алдын алу мен апатты болдырмау жөніндегі қалалық комиссияның дербес құрамын, Семей қаласының 2011 – 2015 жылдарға арналған даму бағдарламасын бекіту туралы 2010 жылғы 29 желтоқсандағы ше-шімге енгізілетін өзгерістерді қарады.
Қалалық мәслихаттың жиырма алтыншы сессиясының күн тәртібі бойынша депутаттар тиісті шешімдер қабылдады.
