1 желтоқсан күні Семей қаласына жұмыс сапарымен ҚР Туризм және спорт вице-министрі Мирас Төлебаев келіп, Абай кітапханасында облыс тұрғындарымен кездесті.
Жадыра ТӨЛЕГЕНҚЫЗЫ,
«Semeı tańy»
Туризм және спорт министрінің орынбасары облыс тұрғындарын алдымен елімізде саланы дамытуда қолға алынып жатқан жобалармен, атқарылған жұмыстармен таныстырды.
— Өздеріңіз білесіздер, ҚР Президентінің «Халық үніне құлақ асатын мемлекет» тұжырымдамасы аясында орталық атқарушы органдар басшылары өңірлерде тұрақты түрде халықпен кездесулер ұйымдастыруда. Бүгінгі жиын қазіргі таңдағы ең өзекті тақырыптардың бірі Қазақстандағы туризмді дамыту мәселесіне арналады. Сарапшылар мен халықаралық ұйымдардың болжамдарына сәйкес, туризм саласы 2023 жылы пандемияға дейінгі кезеңдердегі көрсеткіштерді басып озып, кейінгі қалдырылған сұраныстар есебінен одан әрі дамыды,- деді Мирас Төлебаев.
Вице-министр былтырғы жылдың қорытындысы бойынша Қазақстандағы туризмнің дамуы пандемияға дейінгі көрсеткіштерден асып түскенін айтты. Бұған отандық туризмді қолдау бағытында тартылған инвестициялар, ел ішінде азаматтардың саяхаттауын ынталандыру үшін уақтылы қабылданған шаралар ықпал еткен.
— Былтыр ішкі туристер саны 25 пайызға артты, сондай-ақ шетелден 1 млн-ға жуық турист келді. Биыл тағы 1 млн-ға өседі деген болжам бар. Орналасу орындарының саны 284 бірлікке артып, қонақ үйлер саны 4000-ға жетті. Қонақ үйлер, демалыс базалары, басқа да орындар өткен жылы жалпы сомасы 200 млрд теңге табыс тапқан. Бұл 2020 жылғы табыспен салыстырғанда 70 пайызға артық. Бұл шет ел азаматтарының Қазақстанды туристік бағыт деп қабылдап, қызығушылықтарының артқанын көрсетеді. Ал салық түсімдерінің көлемі рекордтық 400 млрд теңгені құрады, — деді М.Төлебаев.
Вице-министрдің сөзінше, жаңадан құрылған Абай облысында да туризм қарқынды дамуда. Бірінші жарты жылдық қорытындысы бойынша аймақта 70 мыңға жуық адамға қызмет көрсетілген. Оның ішінде ішкі туристер саны 66 мыңнан, сыртқы туристер саны 1,5 мыңнан асқан. Көрсетілген қызметтердің саны шамамен 1 млрд теңгеге жеткен. 2022 жылдың сәйкес кезеңімен салыстырғанда, бұл 130 пайызға артық.
— Биыл 11 айдың қорытындысы бойынша Абай облысында негізгі капиталға салынған инвестициялар көлемі өткен жылдың тиісті кезеңімен салыстырғанда 185 пайызға ұлғайып, 11 млрд теңгеден асты. Осы жылы облыста туристік қызмет нысандарын салу, қайта жөндеу үшін екі кәсіпкер шығындарын субсидиялауға өтінім берді. Айта кетейін, мемлекетіміз осы бағытта кәсіпкер шығындарының 10 пайызын өтеуді қарастырып отыр. Бірақ бұл мүмкіндікті барлық облыстар қолдана бермейді. Ал Абай облысы үшін бұл — өте жақсы көрсеткіш,- деді вице-министр.
Елімізде, дәстүрлі туризммен қатар, экотуризм де дамып келеді. Биыл 2 миллионнан астам адам ұлттық саябақтар мен табиғи аумақтарға саяхат жасаған.
— Отандық және шетелдік туристерді Үржар өңірі көбірек қызықтырады. Дегенмен туризм көрікті жерлерге барумен ғана шектелмейтінін есте ұстаған жөн. Оған жатын орнының, тамақтанудың сапасы, санитарлық аймақтарды тиісті деңгейде жабдықтау да кіреді. Бұл бағытта да тиісті жұмыстар жүргізілуде. Сонымен қатар кез келген турист, мейлі Қазақстан азаматы, мейлі шетелдік болсын, өзінің құқықтары мен бостандықтары, заңды мүдделері бұзылған жағдайда, біздің министрлікке хабарласып, көмек алуға құқылы, — деді Мирас Төлебаев.
Кездесу соңында ҚР Туризм және спорт вице-министрі тұрғындардың сауалдарына жауап берді.
