Кез келген мемлекеттің басты байлығы – халқы. Халықтың әл-ауқаты, денсаулығы және интеллектуалдық деңгейі неғұрлым жоғары болса, мемлекет те соғұрлым қуатты әрі өркениетті болары анық. Елімізде тұрғындардың тұрмысын жақсартуға бағытталған бірқатар ұлттық жобалар жүзеге асырылуда. Соның бірі — «Қуатты өңірлер – ел дамуының драйвері» жобасы.
Әйгерім СӘРСЕНҚАЛИ,
«Semeı tańy»
2021 жылдың соңында қабылданған бұл жоба тұрғын үй, ауыз су мен жылу, көлік қатынастары, оның ішінде сапалы жолмен қамтамсыз ету сынды мәселелерді шешуге бағытталған. Сонымен бірге демографиялық дисбалансқа, аймақтардың арасындағы тепе-теңдікке ден қойған ұлттық жоба оңтүстіктен солтүстікке тұрғындардың өз қалауымен көшіп келуіне жағдай жасап отыр.
28 ұлт пен ұлыс мекен етіп отырған шекаралық аймақ — Бесқарағай ауданында еңбек ресурсын арттыру мақсатында ерікті түрде қоныс аудару бағдарламасы белсенді жүзеге асырылып жатыр. Ол өңіраралық көші-қонды арттырып, аймақтағы экономикалық белсенділікті ынталандыруға жол ашты.
Жыл басынан бері Бесқарағай ауданына Алматы, Түркістан, Қызылорда, Жамбыл облыстарынан, Астана қаласынан және Моңғолия мен Қытай Халық Республикасынан 10 отбасы, 31 адам, қоныстанды.
— Оңтүстік өңірлерден және Моңғолия мен Қытай Халық Республикасынан келген қандастар мен қоныс аударушылар тұрақты жұмысқа орналасты. Ал жұмысқа орналаспағандарына ірі қара мал мен жылқы шаруашылығын дамытуға тегін грант берілді. Сонымен бірге қоныс аударғандар мен үміткерлерге үй салу, сатып алу және ипотекалық тұрғын үй несиесіне бастапқы жарнаның бір бөлігін жабу үшін экономикалық ұтқырлық сертификаты беріледі. Биыл тұрғын үй сатып алуға барлығы 1160 АЕК көлемінде 5 анықтама берілді. Бұған дейін келген қоныстанушылар субсидияларын пайдалана отырып, жеке үй сатып алды. Бұл олардың біздің ауданда тұрақтап қалуларына ықпал етеді,- деді Бесқарағай аудандық Мансап орталығының директоры Алуа Құрманғалиева.
Жалпы, қоныстанушыларға экономикалық ұтқырлық сертификаты беріледі, тұрғын үйді жалға алу мен көшу шығындарын өтеуге мемлекет қолдау көрсетеді. Сертификат аясында бір отбасыға тұрғын үй құнының 50 пайызы, яғни 1160 АЕК-тен аспайтын мөлшерде беріледі. Әрбір отбасы мүшесіне 70 АЕК көлемінде көші-қон шығындарын өтеу мақсатында беріледі.
Айта кетсек, жобаны жүзеге асыру бағытында өңтүстік өңірлерге барып, кездесу ұйымдастырудың маңызы зор. Жаз маусымында Түркістан облысының тұрғындарымен жүздескен Абай облысының деллегациясы жуырда Жамбыл облысында болды.
Жамбыл облысына қарасты Байзақ ауданы, Бурыл ауылдық мәдениет үйінде өткен кездесуде «Қуатты өңірлер — ел дамуының драйвері» ұлттық жобасы аясында Абай облысының делегациясы жергілікті тұрғындармен кездесті.
Абай облысы әкімдігі жұмыспен қамту және әлеуметтік бағдарламаларды үйлестіру басқармасының міндетін атқарушы Еркебұлан Накипов 2021-2025 жылдарға арналған кәсіпкерлікті дамыту жөніндегі Ұлттық жобаның мақсаты мен міндетін егжей-тегжейлі түсіндірді. Делегация құрамында Абай облысы әкімдігі жұмыспен қамту және әлеуметтік бағдарламалар бөлімінің басшысы Серік Жұмаділов, “Оралмандарды бейімдеу орталығы” қоғамдық бірлестігінің басшысы Айнұр Табилтай, “Еңбек мобильділігі орталығы» директорының міндетін атқарушы Еркебұлан Тұрсын және аталған орталықтың мамандары болды.
Кездесу барысында «Қуатты өңірлер – ел дамуының драйвері» жалпыұлттық жобасының тиімді тұстары түсіндірілді. Кездесу соңында бос жұмыс орындарына жәрмеңке ұйымдастырылып, шараға қатысушылар өздерін толғандырған сауалдарына жауаптар алды.
