Еліміздің шығысы, соның ішінде жаңадан құрылған Абай облысы өзендері мен көлдерінің, жасанды су қоймаларының саны жағынан республика бойынша алдыңғы орында. Сондықтан да болар, өңірімізде су шаруашылығы жергілікті атқарушы билік тарапынан жіті көңіл бөлуді талап етеді.
Әлібек КЕМЕЛХАН,
«Semeı tańy»
Бүгінгі таңда Абай облысында резервтік су қоймасы мен су учаскелерін бекіту жұмыстары жүргізіліп жатыр. Табиғи ресурстар және табиғатты пайдалануды реттеу басқармасының мәліметіне сүйенсек, Алакөл көлінде кәсіптік балық аулау үшін екі балық шаруашылығының учаскесі, сондай-ақ резервтік қордан кәсіптік балық өсіру үшін Балықтыкөл көлі арнайы бөлінген. Облысымызда сонымен қатар тағы 11 резервтік аумақ пен жергілікті маңыздағы 14 су қоймасы бар, алдағы уақыттарда бұлар да пайдаланушыларға бекітіліп берілуі тиіс.
Айта кетерлігі, балық аулау аймағы Балық шаруашылығы комитеті мен оның аумақтық бөлімшелері өткізетін конкурс арқылы тағайындалады. Жеке кәсіпкерлер үшін балық шаруашылығы учаскесін алудың бірқатар міндеттемелері бар. Оның басты шарты кәсіпкердің шағын болса да балық өнімдерін өңдеу цехы — кесу, кептіру, салқын күйде және ыстықтай ыстау, балық ұнын, консервілерді өндіру және т.б. қондырғылары болуы қажет. Балық шаруашылығының су айдыны мен аумағын бекіту жұмыстары облысымызда жаңа балық өңдеу кәсіпорнын, тауарлық балық өсіруге арналған балық шаруашылығын құруға, жалпы саланы дамытуға серпін береді.
Өткен қыркүйек айында Абай облысы бойынша жергілікті маңызы бар балық шаруашылығы су тоғандарының тізбесі жасалынған болатын. Су тоғандарының көбі Жарма ауданына тиесілі екен. Аталған ауданда жасанды немесе табиғи түрдегі 16 су қоймасы бар. Сондықтан да әсіресе жаз бен қыс айларында ауданға туристер көптеп келеді. Сол себепті тек әуесқой немесе өнеркәсіптік мақсатта ғана емес, бұл өңірде спорттық балық аулау да кеңінен танымал.
Соңғы жылдары облыста балық шаруашылығы қарқынды дамып келеді. Әсіресе Көкпекті ауданы мен Семей қаласында ілгерілеу бар. Сол тәрізді қысқы мезгілде балықты мұз үстінен спорттық мақсатта аулау да кеңінен жолға қойылуда. Мұның барлығы аталған саланы реттеуді, бекітілген заңнамалар аясында тиісті іс-шаралар қабылдауды қажет ететіні сөзсіз. Облысымызда, резервтік су қоймасы мен су учаскелерін бекіту жұмыстарымен қатар, тексеру, қадағалау шаралары да қатар жүргізілуде. Балық және аң аулау ережелерін бұзу фактілерін анықтау мақсатында өңірдің барлық су айдындарында рейдтер тұрақты түрде өткізілуде. Соның нәтижесінде биылғы күзде бірқатар заңбұзушылық фактілері де анықталып отыр. Мәселен, жуырда Абай облысының Табиғи ресурстар және табиғатты пайдалануды реттеу басқармасына қарасты Орман және аңшылық шаруашылығының жедел жасағы Ақсуат ауданындағы Зайсан көлінің аумағында рейдтік іс-шаралар жүргізді. Айта кетерлігі, Абай облысы көлемінде қараша айының 10-нан бастап желтоқсанның 10-на дейінгі аралықта кейбір балық түрлерінің уылдырық шашуына байланысты балық аулауға қатаң тыйым салынған.
«Соның нәтижесінде көлдің тыйым салынған аумағында тиісті құжаттарсыз, қолдануға рұқсат етілмеген тормен заңсыз балық аулаған Өскемен қаласының тұрғыны ұсталды. Аталған фактіге байланысты ҚР Қылмыстық кодексінің 335-бабы 1-бөлігінің 1-тармағымен (Балық ресурстарын, басқа да су жануарларын немесе өсiмдiктерін заңсыз алу) қылмыстық іс қозғалды. Заңсыз балық аулағандардың салдарынан мемлекетке келтірілген шығын мөлшері 577 478 теңгені құрады. Қылмыстық іс материалдары сот органдарына жіберілді», — делінген облыс әкімдігі таратқан хабарламада.
