Ақсуат ауданы әкімдігінде өңір басшысы Асхат Смаиловтың төрағалығымен өткен кезекті аппарат мәжілісінде ауданның әлеуметтік-экономикалық даму көрсеткіштерінің орындалуы, бюджет қаражатының тиімділігін бағалау көрсеткіштері және «Ауыл — Ел бесігі» бағдарламасына жобалардың әзірлігі мәселесі қаралды.
Әлібек КЕМЕЛХАН,
«Semeı tańy»
Жиынға аудан әкімінің орынбасарлары, аудандық мәслихат төрағасы, «AMANAT» партиясы филиалының атқарушы хатшысы, бөлімдер мен мекемелер басшылары, ауылдық округ әкімдері, жергілікті БАҚ өкілдері қатысты.
Күн тәртібіндегі мәселе бойынша аудандық экономика және қаржы бөлімінің басшысы С.Серікова баяндама жасады.
Бөлім басшысы соңғы он бір айда жоғары көрсеткіштерге қол жеткізілгенін айтты.
— Биылғы жылы әр сала бойынша жақсы жетістіктерге жетіп отырмыз. Негізгі көрсеткіштерде тұрақты өсім бар. Салыстыра қарағанда, өткен 11 айда ауыл шаруашылығы өнімдерінің жалпы көлемі 39 млрд 381 млн теңгеге жетсе, биылғы жылдың 12 айын қоса есептегенде, 40 млрд 466,2 млн теңгеге дейін өсетін болады. Немесе нақты көлем индексі жүз пайызға орындалады деп күтілуде, — деп атап өтті баяндамашы.
Бүгінгі Ақсуат ауданы шаруашылығы тұрақты дамып, ішкі өнім көлемі күрт өсіп келе жатқан өңір. Оған бір дәлел — негізгі капиталға тартылған инвестиция көлемі өткен жылы 5 млрд. 328,1 млн. болса, биылғы жылдың қорытындысымен 12 млрд.805,2 млн. теңгені құрайды деп күтілуде. Яғни, екі еседен артық нәтиже бар.
Айта кетер бір жайт, аудан бойынша тартылған инвестицияның 24 пайызы бюджет қаражаты есебінен болса, 76 пайызы жекеменшік қаражат есебінен. Былтырғы жылмен салыстырғанда бюджет қаражатынан тартылған инвестицияның көлемі 181 пайыз болса, жекеменшік қаржы есебінен тартылған инвестиция көлемі үш есе өскені байқалады.
Жекеменшік сектордан тартылған инвестиция, негізінен, жергілікті жердегі ауыл шаруашылығы саласын дамытуға бағытталып, 3,6 млрд теңгенің қаражаты толықтай игерілген. Соның ішінде, жекелей тоқталар болсақ, салынған қаржы, негізінен, мал бордақылау алаңдары, мал қоралары, асыл тұқымды малдарды күтіп ұстауға, ауылшаруашылық техникаларын алуға жұмсалыпты.
Сонымен қатар аудандағы ішкі туризмді дамытуға жалпы көлемі 1,5 млрд теңге, тұрғын үй құрылысына 1,6 млрд теңге бағытталыпты.
Ауданға инвестиция тарту бағытындағы жұмыстар алдағы уақыттарда да жалғасын таба бермек. Негізгі капиталға салынған инвестицияларды жаңа жобалар есебінен толтыру, инвестициялар көлемінің азаюына жол бермеу, қолға алынған жобалардың жүзеге асырылу сапасын бақылау, аяқталу мерзімін болжап, өсімнің қосымша көздерін жүйелі түрде іздестіріп отыру шаралары тұрақты назарға алынған.
Өңірлерді дамытуда инвестициялардың игілігі зор екенджігі белгілі. Бұл ретте «Инвестиция — экономиканың екінші тынысы» деп бекер айтылмаса керек. Ал инвестор тарту үшін, аудандағы экономикалық ахуал тұрақты, әлеуметтік даму көрсеткіші жоғары және атқарушы билік тарапынан қолдау болуы қажет. Бұл тараптағы жұмыстар аудан әкімінің тарапынан тұрақты түрде қадағалауға алынған.
-Сонымен қатар, ағымдағы жылдың 11 айында 7945 шаршы метр тұрғын үй салынған. Өткен жылы бұл көрсеткіш 6287 шаршы метр болған еді. Жұмыс істеп тұрған шағын және орта бизнес субъектілерінің саны 2279 бірлікті құрап, өткен жылдың тиісті мерзімімен салыстырғанда 158 бірлікке артып отыр. Ал, осы жылдың 11 айында жергілікті бюджетке түскен меншікті түсімдер 2 млрд.184,5 млн.ға жетіп, өткен жылдың есепті мерзімімен салыстырғанда 5,8 есе артығымен орындалды, — деді бөлім басшысы өз сөзінде.
Бұл көрсеткіш жылдың аяғына дейін тағы да арта түсетіні анық.
Сонымен қатар, аталмыш жиын барысында аудан өміріне қатысты ағымдағы әртүрлі мәселелер де қаралып, кеңінен талқыланды. Бұған байланысты аудан әкімі Асхат Смаиловтың тарапынан тиісті сала басшыларына бірқатар тапсырмалар жүктелді.
