24 желтоқсан күні «Тайқазан» салтанат сарайында Қазақстан Республикасы Президенті Қасым-Жомарт Тоқаевтың «Қош келдің, Жаңа жыл!» атты Жаңа жылдық шыршасы өтті. Мерекелік жиынға Абай облысының әкімі Нұрлан Ұранхаев, Абай облысының әр ауданы мен қаласынан келген 200 оқушы қатысты.
Сымбат ҚАЙРАТҚЫЗЫ,
«Semeı tańy»
Президент шыршасына тұрмысы төмен, жетім, ерекше қажеттілігі бар, сонымен қатар, оқуда, спортта және шығармашылықта жетістікке жеткен дарынды 9 -13 жас аралығындағы балалар шақырылыпты.
Облыс әкімі Нұрлан Ұранхаев Мемлекет басшысы Қасым-Жомарт Тоқаевтың атынан балаларды құттықтап, Жаңа жылда барлық армандарының орындалуын тіледі.
— Бүгін Қазақстан Республикасы Президентінің Жаңа жыл кеші жер-жерде өткізіліп жатыр. Құрметті балалар, Сіздерді келе жатқан Жаңа жыл мерекесімен құттықтаймын. Сіздер — еліміздің болашағысыздар. Сондықтан біз сіздерге барлық жағдайды жасауға тырысамыз. Әр кішкентай баланың үлкен арманы бар. Армандарыңыздың барлығы орындала берсін. Мақсаттарыңызға жете беріңіздер,– деді облыс әкімі Нұрлан Ұранхаев.
Мерекелік шара аясында ертегі әлеміндегі кейіпкерлердің қатысуымен шоу-қойылымдар ұйымдастырылды. Анимациялық фильм кейіпкерлері шырша тойының шырайын кіргізіп, балаларға қуаныш сыйлады. Бүлдіршіндер қоян жылын шығарып салып, жаңа ұлу жылын қарсы алды. Аяз ата мен Ақшақарға өз өнерлерін көрсетіп, сыйлық алды. Балалар мен жастардың шығармашылық сарайы, Балалар балет мектебінің аниматорлары мен шығармашылық ұжымдарының қатысуымен театрландырылған қойылымды тамашалады.
— Бүгін шынымен де тамаша мейрам. Президент шыршасына арнайы кастюм тігіп, дайындалдым. Мен ертегі кейіпкері Микки Маус болып киіндім. Мереке өте көңілді өтуде, маған қатты ұнады, — деп Жарма ауданынан келген 6 сынып оқушысы Гүлім Кекенқызы Жаңа жылға деген ізгі тілегін білдірді.
Іс-шара соңында барлыққатысушыларға Қазақстан Республикасы Президентінің атынан 100 мың теңгелік сертификат, 2024 жылдың басты символы бейнеленген ойыншық түрінде сыйлық жиынтықтары табысталды.
