Қуаныш ЖОЛЫМБЕТ,
«Semeı tańy»
Жиын барысында өткен жылғы өңірлік жұмыспен қамту картасының орындалу қорытындысы қаралып, биылғы жылға арналған жоспар бекітіліп, жаңа және ауыспалы жобалардың жобалық-сметалық құжаттамасын әзірлеу барысы талқыланды.
Өңірлік жұмыспен қамту картасы шеңберінде өткен жылы облыста 27 557 жұмыс орны құрылып, жоспар көлемі 110,6 пайызға орындалған. Бұл атқарылған жұмыстардың оң нәтиже бергенін айғақтайды.
Ал биыл бизнес-идеяларды жүзеге асыру үшін 23 879 жұмыс орнын құру, 484 шағын несие беру және 204 грант беру жоспарланған.
Жиын барысында айтылғандай, биыл облыста жалпы саны 104 әлеуметтік нысан салу жоспарланып отыр. Құрылыс жұмыстары бюджет қаражаты есебінен жүргізіледі деп жоспарлануда. Оның ішінде денсаулық сақтау саласында – 67 нысан, білім беру саласында – 16 нысан, әлеуметтік қамсыздандыру саласында –1 нысан, сондай-ақ 11 спорт нысаны, 3 мәдениет нысаны салынады деп күтілуде.
Сонымен қатар қазіргі таңда еліміз бойынша қарқынды түрде жүзеге асырылып жатқан «Ауыл — Ел бесігі» мемлекеттік бағдарламасы аясында облысымызда 55 жоба қолға алынып, жүзеге асырылып жатыр. Оның бірі өткен жылы қолданысқа енгізілді.
Тағы бір айта кетер жайт, бүгінде Абай облысының энергетика және тұрғын үй-коммуналдық шаруашылық басқармасы 141 инфрақұрылымдық жобаны жүзеге асырып жатыр.
Кеңейтілген отырыста сонымен қатар қалалық және аудандық әкімдіктер мен облыстық басқармалардың жеке және заңды тұлғалардың өтініштерін қарау жұмыстары да талқыланды. Өткен жылы Абай облысының жергілікті атқарушы органдарына 29 481 өтініш келіп түскен екен. Олардың барлығына да қанағаттанарлық жауап берілген. Азаматтарды қабылдау орталығында бекітілген кестеге сәйкес жеке қабылдаулар да өткізіледі.
