1 наурыздан бастап республикалық бюджеттің қаржыландыруымен, «Отбасы банк» арқылы жүзеге асырылатын «9-20-25» ипотекалық бағдарламасы іске қосылады. Бұл туралы жақында Үкімет отырысында Премьер-министрдің бірінші орынбасары Роман Скляр мәлімдеді.
Әйгерім СӘРСЕНҚАЛИҚЫЗЫ,
«Semeı tańy»
Ипотеканың жылдық пайыздық мөлшерлемесі – 9 пайыз, несиелеу мерзімі – 25 жыл. Баспаналы болғысы келген азамат үй құнының 20 пайызы мөлшерінде алғашқы төлем жасауы керек. Бағдарлама жас отбасыларға арналған. Бірақ нақтылы жас шектеуі туралы ақпарат жоқ.
Осыған дейін бағдарламаға қатысушылардың қатаң тексерілетіні айтылған болатын. Бағдарламаның басты шарты – соңғы бес жыл көлемінде үміткердің атында баспанасы болмауы керек.
— «9-20-25» бағдарламасы бойынша өтінім беру кезінде үміткердің атында соңғы бес жылда баспана тіркелмеген болуы керек. Біз мұны мемлекеттік деректер базасы арқылы тексереміз. «7-20-25» бағдарламасындағыдай, алған пәтерін бүгін сатып жіберіп, ертең мемлекеттік бағдарламамен баспана алуға тағы да өтінім беру сияқты әрекеттер іске аспайды. Сонымен қатар жаңа бағдарлама бойынша бір рет қана өтінім беріледі. «7-20-25» бағдарламасында қатысу бойынша шектеу болған жоқ. Яғни 2019 жылы пәтер сатып алған азамат баға өскенін пайдаланып мүлкін сатып, 2021 жылы тағы да қатысуға мүмкіндік алатын. Енді жаңа бағдарламада мұндайға тыйым салынған»,- дейді «Отбасы банк» басшысы Ләззат Ибрагимова.
Бағдарламаға республикалық бюджеттен 150 млрд теңге бөлінеді. Бір жылда шамамен 8 мың адам баспаналы болады деп күтіліп отыр.
