Семей қаласындағы №44 жалпы орта білім беретін мектепке жаңа автобус берілді.
Кербез ЖАЙСАНБЕКОВА,
«Semeı tańy»
Балаларды мектепке тасымалдаудың қауіпсіз әрі жайлы болуын қамтамасыз ету мақсатында табысталып отырған көлікті білім ошағының басшылығы қабылдап алды.
Айта кетейік, Мұрат саяжайының тұрғындары оқушылардың мектепке қатынауы қиындық туғызатынын айтып, қала әкімдігінен автокөлік бөлуді сұраған болатын. Міне, саяжай тұрғындарының тілегі орындалып, мәселе шешімін тапты.
— Автобус балаларды №44 жалпы орта білім беретін мектептен Мұрат саяжайы бағытына тасымалдайды. Таңғы 7:20-да соңғы аялдамадан шығады. Оқушыларды үш уақыт тасымалдайтын болады, — дейді Семей қаласы әкімінің бас инспекторы Берік Нұрболатұлы.
22 орындық автобус барлық заманауи талаптарға сай жасалған. Қауіпсіздік белдіктерімен, сөмкелерге арналған сөрелермен жабдықталған.
— Мектебімізге жаңа автобус беріліп отыр, енді шәкірттеріміз білім ордасына еш қиындықсыз келіп-кететін болды. Бұл — ата-аналар мен оқушыларымыз үшін қуанышты жаңалық. Игі іс білім деңгейін жоғарылатуға да өзіндік үлес қосары анық, — дейді мектеп басшысы О.Жұмағалиев.
Ал 20 ақпаннан бастап Бобровка саяжайы бағытына тағы бір автобус оқушыларды тасымалдайтын болады.
