Соңғы жауған қар халықты біраз әбігерге салды.Кешелі-бері Омбы-Майқапшағай тас жолының бойында қалған жолаушыларды қар құрсауынан азат ету жұмыстары жүріп жатыр. Әсіресе Ақсуат, Зайсан, Тарбағатай, Көкпекті аудандарына қарай жолға шыққан көлік жүргізушілері қыс түскенде Байбура асуы қауіпті өткел. Боранда қалғандар Байбураден аман шыққандарына шүкіршілік етіп жатады.Басқа жерлерде жел соқпағанымен Байбура асуында қыста боран,жазда жел бір үзілмейді.
Осы асуға аты берілген Байбура би кім болған?
Қауіпті асуды жұрттың бәрі білсе де, Байбура бидің кім екендігі көпке беймәлім. Байбура би 1720-1793 жылдары өмір сүрген Абылай хан тұсындағы аты әйгілі Қожаберген батырдың ұлы. Яғни, он екі рулы Абақ керейден тараған. Тарих ғылымдарының докторы Бақыт Еженханұлының «Қожаберген батыр» атты кітабындағы «Қожаберген батырдың тегі және өмір жасы хақында» деген бөлімінде Байбура Қожабергеннің екінші әйелінен туатыны, оның 1759 жылы 2 қыркүйек күні бір топ қазақ азаматтарымен бірге Үрімжіге жылқы айдап апарып, сауда жасағаны туралы деректер келтірілген.
Бүгінде Байбураның Қазақстан, Қытай, Моңғолия жерінде үш мыңнан астам ұрпағы бар деседі. Олардың дені, Қытайдың Алтай аймағы Қаба ауданына қоныстанған.
«Байбураның зираты Кеңес заманында жолдың астында қалып қойған. Қасиетті би аруағы сондықтан ашулы екендігі жайлы ел аузында аңыз бар.
Ел ортасына тараған бір аңызда Байбура жастайынан өнердің әр түрін меңгерген шебер және сөзге жүйрік болып ер жетеді.
Сол дәуірде орта жүздегі арғын мен уақтың арасында «Керімбаланың дауы» туады. Оқиға Арғынның Қарабас деген азаматы уақтың Керімбала деген аруына қалың беріп, құда болады. Қыз жасау-жабдығын артып ұзатылып келе жатқан жолда Қарабас жол-жөнекей тағы бір қызға ғашық болып, екеуін қабаттастырып алмақ болады. Керімбала бұған көнбей, кері қайтады. Сөйтіп, екі жақта дау туады. Күн өткен сайын күрделеніп бара жатқан бұл дауға қатысты билікті Байбураға айтқызуға қос тарап та бірауыздан келісім береді. Сондағы Байбураның кесімі: «Бір тойда екі жар болмайды, сондықтан Қарабастың ісі қазақ дәстүріне жат. Босағасын аттамаған соң, Керімбаланың басы қазірден бастап бос дейді. Әуелгі қателік жігіттен кеткендіктен, қалың мал қайтарылмайды». Содан бастап тура сөйлеп, әділ төрелік айтқан Байбураны жұрт «Қара би» атап кеткен көрінеді-мыс.
