Кеше Шығыс Қазақстан облысының әкімі Бердібек Сапарбаев Семей өңіріне кезекті жұмыс сапарымен келді. Шаһардағы жағымды жаңалықтарға куә болған аймақ басшысы Семейдегі сапарын қала маңындағы Приречное ауылынан бастады. Аталмыш ауылдағы дәрігерлік амбулаторияның ашылуына қатысты.
2700-ден аса халқы бар Приречное ауылдық округінде осы уақытқа дейін дәрігерлік амбулаториялық емдеу мекемесі болмағанын айтады мамандар. Емдеу мекемесінің бас дәрігері Нұрхан Тұмабаеваның сөзіне сүйенсек, ауылдағы ғимараттың біріне күрделі жөндеу жүргізіліп, бұл іске «Агрофирма Приречное» ЖШС-нің басшысы Мұхит Тұмабаевтың қолдауы нәтижесінде аталған кәсіпорынның есебінен бірнеше миллион теңге қаржы бөлініп, медицина қызметкерлері сол мекемеде үш жылдан бері тұрғындарға қызмет көрсетіп келген. Ал, іргетасы үстіміздегі жылдың қыркүйек айында қаланған жаңа ғимараттың құрылысының жұмыстары үш айдың ішінде толығымен аяқталған. 74 млн. теңгеден астам қаржы жұмсалған ғимараттың құрылысын өскемендік «Күршім құрылыс» ЖШС-і мердігер компаниясы жүргізген. Алыстан көз тартатын бір қабатты сәулетті ғимаратта дәрігерлерге барлық жағдай жасалған. Заманауи технологиялармен жабдықтал-ған медициналық мекемеде 16 дәрігер халыққа қызмет көрсетеді.Енді амбулатория Приречное ауылдық округіне қарасты Мұздыбай және Жарқын ауылдарының тұрғындарына да қызмет көрсетуге әзір. Ал, жылу жүйесі «Приречное агрофирмасы» ЖШС-нен тартылғанын айтады мекеме басшысы. Дәрігерлік амбулаторияның ашылу салтанатына арнайы келген ШҚО әкімі Бердібек Сапарбаев:
— Ауылдарыңызда үлкен жаңалық болып жатыр. Ең үлкен байлық денсаулық болса, бұл медициналық мекеме жұртшылықтың денсаулығын жақсартуда зор көмегін тигізеді деп ойлаймын. «Саламатты Қазақстан» бағдарламасы аясында еліміздің әр аймағында осындай дәрігерлік амбулаториялар салынуда. Еліміз бойынша 127 медициналық мекеме салу жоспарланса, соның 30-ы Шығыс Қазақстанда салынуға тиіс болатын. Бүгінде, оның 10-ы салынып бітті. Ал, бұл мекеме 11-ші. Жалпы Приречное ауылы гүлденіп келе жатыр. Бастысы, мұнда шаруашылық бар, тұрғындар жұмыспен қамтылып отыр. Енді еселі еңбекті ары қарай жалғастыра беру керек. Сол үшін сіздерге мықты денсаулық тілеймін. Ал, дәрігерлердің жұмысы аз болсын. Уақыт өткен са-йын емделушілеріңіздің саны азая берсін. Жақындап қалған Жаңа жыл мерекелеріңіз құтты болсын, — деді өз сөзінде.
Аймақ басшысының сөзінен соң Приречное ауылы Ақсақалдар алқасының төрағасы Тілеухан Тағлиманов сөз алып, ауылда дәрігерлік амбулаторияның бой көтергеніне қуанышты екенін жеткізіп, емдеу мекемесін салуға атсалысқан азаматтар мен салтанатты шараға арнайы келген облыс және қала әкімдеріне алғысын айтты.
