Осы аптада Шәкәрім университетінде «Орман өрттері — ХХІ ғасырдың жаһандық мәселесі» атты халықаралық ғылыми–тәжірибелік конференция өтті. Конференцияға әлемнің түкпір-түкпірінен келген жетекші ғалымдар, зерттеушілер, саясаткерлер, қоғамдық және үкіметтік емес ұйымдардың өкілдері қатысты.
Айтолқын САМАТОВА,
«Semeı tańy»
Іс-шараны Абай облысы әкімдігі, Шәкәрім университеті және Абай облысы Төтенше жағдайлар департаменті бірлесіп ұйымдастырды.
Конференция ең өзекті экологиялық проблемалардың бірі – орман өрттерімен күресте инновациялық тәсілдер мен технологияларды әзірлеу және енгізу үшін қажетті жаһандық диалог пен ынтымақтастық орнатуға бағытталды. Қатысушылар орман өрттерінің алдын алу және бақылауға байланысты стратегияларын және тәжірибелері мен білімдерін бөлісті. Орман өрттерінің себептері мен салдарын, олардың алдын алу және сөндіру әдістерін талқылады, сондай-ақ аталған жаһандық мәселені шешудегі халықаралық қауымдастықтың маңызына тоқталды.
Ресей мен Болгарияның жоғары оқу орындарының мамандары қарағайлы орманды қайта түлетудің тиімді жолдары туралы айтты. Олардың пайымынша, әлемдік тәжірибеге сүйене отырып, шекаралық аймақтағы ағаштарды кесіп, азайту керек. Тілсіз жауды ерте анықтау үшін цифрлы технологияларды қолданып, әуеден барлау жүргізу қажет. Былтырғы Абай облысындағы алапат өрт кезінде 63 мың гектар аумақ отқа оранған болатын. Келген шығын көлемі – 160 миллиард теңге.
— Біздің зертханамызда орманды жедел қалпына келтіретін кешен әзірленіп жатыр. Жобаның мақсаты – қарағайды тездетіп өсіру. Мұның пайдасы зор. Топырақта жылу да, ылғал да сақталады,- дейді Экологиялық зерттеулер орталығының жетекшісі Алексей Клевенко.
Цифрлық технологияларды пайдалана отырып орман өрттерінің алдын алу қазіргі уақытта аса маңызды. Сондықтан мүдделі мемлекеттік органдар мен ғалымдардың қатысуынсыз бұл мәселені шешу мүмкін емес.
