Семей қаласында 860 қоғамдық тамақтандыру орындары бар. Сол қоғамдық тамақтандыру орындарындағы санитарлық жағдай көңіл көншіте ме? Бұл жайлы Абай облысының санитариялық-эпидемиологиялық бақылау департаментінің мамандарымен өңірлік коммуникациялар қызметінде өткен баспасөз мәслихатында айтылды.
Әйгерім СӘРСЕНҚАЛИ,
«Semeı tańy»
Облыс орталығындаға 860 қоғамдық тамақтану нысанының 130-ы 50 және одан да көп орынға арнаған. Өзіміз түстеніп жүрген сол асханалардың ішінде санитарлық талаптарды қатаң сақтайтындар да, тазалығы көңіл көншітпейтіндері де бар. Былтыр Семей қалалық санитариялық-эпидемиологиялық бақылау басқармасына жеке және заңды тұлғалардан 68 шағым түсіпті. Сондықтан бірқатар тамақтандыру орындары жоспардан тыс тексерілген. Тексеру барысында қаладағы нан өнімдерін саудалайтын дүңгіршектің бірінде санитарлық талаптар сақталмағаны анықталып, иесі әкімшілік айыппұл арқалапты.
— Жоспардан тыс тексеру жүргізілгеннен кейін, дүңгіршек иесі, Әкімшілік құқық бұзушылық туралы кодекстің 425-бабының 1-бөліміне сәйкес, әкімшілік жауапкершілікке тартылды. Сондай-ақ орындау мерзімі белгіленіп, заң бұзушылықтарды жою туралы нұсқама жазылып, 230 АЕК мөлшерінде айыппұл салынды. Сонымен қатар ӘҚБтК-нің 463-бабының 1-бөліміне сәйкес әкімшілік хаттама толтырылып, Семей қаласының әкімшілік құқық бұзушылықтар жөніндегі мамандандырылған ауданаралық сотына жіберіледі, — деді Абай облысының санитариялық-эпидемиологиялық бақылау департаментінің тамақтану объектілерін бақылау және қадағалау басқармасының басшысы Әйгерім Мұсатаева.
Мамандардың айтуынша, біздің өңірімізде ғана емес, жалпы елімізде көше бойында нан өнімдерін саудалайтын дүңгіршектерде санитарлық рұқсат құжаттарының және қызметкерлердің медициналық кітапшасының болмауы жиі кездесетін заң бұзушылықтар қатарында екен. Сондықтан ас алатын орынды да талғап таңдаған абзал.
Бір қуанарлығы, өткен жылы облыс аумағында тамақтанудан жаппай улану деректері тіркелмеген.
