Приречное ауылынан шыққан соң облыс басшысы қаладағы «СемАз» ЖШС-не ат басын бұрды. Кәсіпорын басшысы Әсемхан Досқожанов облыс әкімі Бердібек Сапар-баевты өздерінің атқарып жатқан жұмыстарымен таныстырып өтті. Серіктестік басшысының айтуынша, кәсіпорын «Беларусь 920», «Беларусь 892» тракторлары мен «Урал» жүк көлігі сияқты жаңа техникаларды шығара бастаған. Енді «Урал» жүк көлігінің жылына 400 бірлігін шығару жоспарланып отырған көрінеді. Сонымен қатар, зауытта SHAСMAN маркалы (25 тонналық жүкке арналған) жүк көлігі де шығарылған. Биылғы жылы бұл техникаларға тұтынушылар тарапынан тапсырыстың да көп болғанын жеткізді кәсіпорын жетекшісі.
— Қазақстан өндірісінде бұрын болмаған ауыр жүк көліктерін Семейдің шығара бастағаны көңіл қуантады. Сонымен қатар, автобустар да шығарыла бастады. Елімізде өндіріліп жатқандықтан, бұл техникалардың бағасы қолжетімді болады. Бұл да жұртшылық үшін жақсы жаңалық, — деп атап өтті Б.Сапарбаев.
