Бұдан кейін аймақ басшысы Энергетик кентінде салынып, қолданысқа берілген 9 қабатты 72 пәтерлік тұрғын үйдің ашылу салтанатына қатысып, жаңадан қоныстанушыларға пәтер кілтін табыстады. Жалпы биылғы жылы 400 семейлік отбасы жаңа пәтердің кілтін алып, қоныс тойын тойлауда. Салынып, қолданысқа берілген барлық тұрғын үйлер «Қолжетімді баспана — 2020» бағдарламасы негізінде жүзеге асуда. Тек қана биылдың өзінде Семей қаласы бойынша бес көпқабатты тұрғын үй тұрғындар игілігіне берілуге жоспарланған. Осы бес үйдің бірі жастарға арналған жатақхана болса, біреуі «Тұрғын үй құрылыс жинақ банкі» арқылы өз иелеріне тапсырылған. Ал қал-ған көпқабатты үйлер тұрғын үй кезегінде тұрғандарға жалдамалы тұрғыда берілуде. Айта кету керек, аталмыш үйлердің құрылыстары 2012 – 2013 жылдары жүргізілген. Осыдан – ақ Семей қаласындағы тұрғын үй құрылысының қарқыны жаңаша сипат ал-ғандығын анық аңғаруға болады.
Бердібек Мәшбекұлы жиналғандар алдында Семей қаласында биылғы жылы жағымды жаңалықтың көп болғандығын атап өтті. Әр адам үшін баспана ең үлкен мәселе екендігін, осы ретте мемлекет тарапынан тиісті қолдау көрсетіліп жатқандығын да жеткізді.
-Елбасы Н. Назарбаевтың тапсырмасына сәйкес, елімізде «Қолжетімді баспана — 2020» бағдарламасы сәтті жүзеге асып жатыр. Осыған орай, біздің облысымызда жылына 240 – 270 мың шаршы метр үй қолданысқа беріледі. Семей қаласында да тұрғын үй мәселесі өз шешімін тауып келе жатыр. Биылдың өзінде 400 отбасы бас- паналы болды. Бұл өте жоғары және көңілге қонымды көрсеткіш. Осындай нәтижелі істердің барлығы мемлекетіміздің халыққа жасап отырған мүмкіндігі, — деп атап өтті Бердібек Мәшбекұлы.
Сондай — ақ, аймақ басшысы баспана бірінші кезекте пәтер кезегінде тұрғандарға, ардагерлерге, көп балалалы отбасыларға, ата – ананың қомқорлығынсыз қалғандарға, мүмкіндігі шектеулі топқа, жас мамандарға бөлінетінін айтып өтті.
-Семей қаласындағы ардагерлер баспанамен биыл толығымен қамтамасыз етіледі. Тұрғын үйдің құрылысын міндетіне алған мердігер мекеме де құрылысты уақытында аяқтады. Бүгін ел игілігіне пайдалануға беріліп отырған үй құрылысының жұмысын қатаң бақылауда ұстап, тиянақты жүзеге асуына тікелей ықпал еткен қала әкімдігінің жұмысын бүгін ерекше атап өтуіміз қажет, — деп аймақ басшысы Семей қаласының атқарушы билігінің бұл тұрғыдағы жұмысына оң бағасын берді.
ҰОС ардагері Байтан Ибрагимов ақсақал облыс басшысы Бердібек Мәшбекұлының қолынан пәтер кілтін алды. Сұрапыл соғыстың ортасында отты жылдарды бастан өткізген көнекөз қария бүгінгі бейбіт күнге мың мәрте шүкіршілік айтады. Мұндай құрметтің көрсетілуі Елбасының барлық ҰОС ардагерлеріне деген ыстық ықыласы деп біледі Байтан ақсақал:
— Осы жасқа келгенде, Жаңа жылдың қарсаңында қуанышқа кенеліп жатқан жайым бар. Облыс әкімі Бердібек Мәшбекұлы мен қаланың әкімі Айбек Кәрімовке аталық ал-ғысымды білдіремін. Қашан да қарттарын құрметтей білген халықтың баласы осындай болсын! — деп ақ батасын жаудырды, қария.
Баспаналы болғандардың қатарында 17 балалы Виктор Кандыбаның жанұясы , қаламызға қызметке келген кардиохирург дәрігерлер , ішкі істер органдарының қызметкерлері мен журналистер де бар.
