19 наурыз күні Абай облыстық Қоғамдық кеңесінің кезекті отырысы өтті. Жиынға облыс әкімі Нұрлан Ұранхаев, басқарма басшылары, ТЖД өкілдері, қоғам қайраткерлері мен бұқаралық ақпарат құралдары өкілдері қатысты.
Қоғамдық кеңес отырысы барысында алдымен облыс әкімі Нұрлан Ұранхаев өткен жылы атқарылған жұмыстар мен облысты әлеуметтік-экономикалық дамытудың биылғы жоспарларымен таныстырды.
Облыстағы өзекті мәселенің бірі – жылу тапшылығы. Аймақ басшысы атап өткендей, өткен жылы 24 шақырым жылу желілері жаңғыртылған. Ал биыл жылумен қамту бойынша 9 жобаны жүзеге асыруға 7,8 млрд теңге бөлініпті. Сонымен қатар ЖЭО-3 құрылысының техникалық-экономикалық негіздемесі әзірленуде. Орталықтың салынуымен қаланың оң жағалауындағы жылу тапшылығы шешілмек.
Сонымен қатар құны 20,6 млрд теңгені құрайтын 46 сумен жабдықтау жобасын жүзеге асыру жоспарлануда.
— Өткен жылы 5720 тұрғынды қамтитын 6 нысан пайдалануға беріліп, облыс бойынша орталықтандырылған сумен қамту үлесі 92,8 пайызды құрады. Бүгінде 46 жобаның 27-сі жүзеге асырылуда. Биыл 6 жаңа жобаны қолға алып жатырмыз. 13 жоба 2025 жылға жоспарланған. Желілердің тозуын азайту үшін 20 елді мекенде қайта жаңғырту жұмыстары жүргізілуде,- деді Нұрлан Ұранхаев.
Семейде сонымен қатар жаңа көпірдің құрылысы қызу жүруде. Пайдалануға беру мерзімі – 2025 жыл. Аспалы көпірді қайта жаңғыртудың жобалық-сметалық құжаттамасы да әзірленуде.
— 2024 жылы 230,9 шақырым жергілікті маңызы бар жолдар орташа жөндеуден өтеді. Бұл мақсаттарға 9,9 млрд теңге бөлінді. «Ауыл – Ел бесігі» бағдарламасы аясында ұзындығы 2.6 млрд теңгеге 52,6 шақырым болатын ауылішілік жолдар орташа жөндеден өтеді. Қоғамдық көлікті дамыту бойынша да жұмыстар жүргізілуде. Автокөлік парктерін жаңғырту 2 жылға жоспарланған. Өткен жылы 70 автобус сатып алдық, биыл тағы 100 автобус алуды жоспарлап отырмыз», — деді Нұрлан Ұранхаев.
Облысымызда Мемлекет басшысының тапсырмасы бойынша өткен жылдың соңында ұзындығы 270 шақырым Бақты-Аягөз темір жолының құрылысы басталды. Жобаның құны 577,5 млрд теңге. Оның аясында 1700 жұмыс орны ашылады деп күтілуде. Құрылысқа 2 мың гектар жер бөлінген. Сондай-ақ Семей-Тачен-Семей бағытында әуе рейсі ашылмақ.
— Семей-Тачен-Семей әуе рейсі ашу бағытында жұмыстар жүргізілуде. Бұл туризмді жандандыруға мүмкіндік бермек. Сонымен қатар елдегі туризмді дамыту картасының алғашқы 10-ына енгізілген Алакөл жағалауында, Шүлбі су қоймасында, Шошқалы көлінде емдеу-сауықтыру туризмін дамытуға мүмкіндігіміз бар. Ірі қытайлық компаниялар тарапынан Алакөл жағалауы мен Барлық-Арасан сауықтыру кешені жанынан қонақ үй құрылысына қызығушылық жоғары. Туристерге қолайлы болу үшін «Жидебай Бөрілі», «Еңлік-Кебек», «Қозы-Көрпеш және Баян Сұлу» кесенелерінің аумағында тиісті инфрақұрылымды құру жұмыстары жүргізілуде,- деді облыс әкімі.
Кеңес отырысында сонымен қатар Абай облысы бойынша ТЖД басшысы Манарбек Шапағатов көктемгі су тасқыны кезеңінде табиғи апаттардың алдын алу, ауыл шаруашылығы басқармасының басшысы Анзор Абаев аймақта ауыл шаруашылығы өндірісін ұлғайту жөніндегі жоспарларымен бөлісті.
Қоғамдық кеңес мүшелері спикерлерге экология, транзиттік әлеует, абаттандыру, сүт өндірісін дамыту саласындағы жобаларға қатысты сұрақтар қойды.
