19 маусым күні «ҚХП» Абай облыстық филиалының ұйымдастыруымен Alikhan Bokeikhan университетінің конференция залында Қазақстан Халық партиясының 20 жылдығына орай «Халықпен бірге 20 жыл» атты дөңгелек үстел өтті.
Іс-шараға облыстық және қалалық ішкі саясат өкілдері, Абай облысы және Семей қаласы мәслихаты депутаттары, қалалық қоғамдық кеңес төрағалары, ҚХП әйелдер қанаты, «Жас Орта» жастар ұйымы, партия белсенділері, жергілікті БАҚ өкілдері, партия белсенділері қатысты.
Шараны ҚХП өңірлік филиалының төрағасы Айдын Егеубаев кіріспе сөзбен ашып, әріптестерін партияның мерейтойымен құттықтады.
— Қазақстан халық партиясының құрылғанына 20 жыл толды. Баршамаызға мерейтой құтты болсын! 2004 жылы құрылып, еліміздегі ең өзекті мәселелерді парламент қабырғасында көтеріп келе жатқан партияның бүгінде ауқымы кең. Абай облыстық филиалы да бұл мерекені ескеріп, партия белсенділерін марапаттауды жөн санадық. 20 жылда атқарылған еңбектеріміз көп. Бүгінде облыстың ең басты проблемасы жұмыссыздық, әйелдердің зейнет жасын төмендету, шахматты дамыту, жастарды қолдау жайын заң шығарушы органдарға жеткізіп жүрміз. Бүгінде партияға облыстан 6 мыңнан аса азамат мүше. Осы аралықта тұрғындардың проблемаларына ат салысып, сеп болған партия алда да бұл жұмыстарды жалғастыра береді, — деп атап өтті партия төрағасы.
Дөңгелек үстел барысында Қазақстан Халық партиясының 20 жылдығына орай партияның, облыстық филиалдың, жастар қанатының бүгінгі атқарып жатқан жұмыстары туралы баяндамалар оқылды. Саяси ұйымның жеткен жетістіктері тізілді. Сондай-ақ ұсыныс-пікірлер тыңдалып, дөңгелек үстелге қатысушылар өз ойларын ортаға салды.
Одан бөлек, партия мүшесі Александр Коновалов пен қоғам қайраткері Аманжол Омардың хабарламасы тыңдалды. Семей қалалық ардагерлер төрағасы Кенжебай Бердікенов жылы лебізімен бөлісті.
— Бүгінгі мерейтой құтты болсын! Осы аралықта партия мүшелері қаншама жұмыс атқарып жатқандығын көзіміз көріп, естіпте жатырмыз. Алдағы уақытта біз сіздермен бірігіп жұмыс жасауға дайынбыз. Себебі, сіздер мен біздердің мақсатымыз біреу. Халықтың өзекті мәселесін шешуге күш салу, — деді К.Бердікенов.
Басқосу соңы марапаттау шараларына ұласты. Айдын Егеубаев облыстық филиал ұжымына 20 жылдыққа орай құттықтау хаты табысталды.
Сымбат ҚАЙРАТҚЫЗЫ,
«Semeı tańy»
