Облысымызда өткен жылы 204 адам грант иегері атанса, мемлекет қазынасынан биыл да 204 үміткердің жобасын қолдауға қаржы бөлінген. Бірінші лекте 102 жоба іріктеліп алынса, санаулы күн бұрын екінші лек бойынша 102 грант иегері анықталды.
400 АЕК көлеміндегі қайтарымсыз грант халықтың әлеуметтік осал тобындағы азаматтарға бизнес-идеяларын іске асыруына қолдау көрсету үшін беріледі. Абай облысы Мансап орталығының мәліметіне сүйенсек, екінші лекте 15-26 шілде аралығында грант алуға Business.enbek.kz порталы арқылы 304 адам өтінім берген. 30 шілде мен 8 тамыз аралығында қала мен аудандарда мемлекеттік гранттар беру жөніндегі комиссиялардың отырысы өтіп, мансап орталықтарының әлеуметтік желідегі парақшаларында тікелей эфирде көрсетілді. Үміткерлер мал шаруашылығы, құс шаруашылығы, тігін ісі, наубайхана, кондитерлік өнімдер, полиграфия және химиялық тазарту қызметі және басқа да бағыттар бойынша бизнес жобаларын қорғады.
Комиссия шешіміне сәйкес, жеке кәсібін ашуға және дамытуға 102 адамға грант тағайындалды.
Сөзіміздің басында айтып кеткеніміздей, облысымызда жаңа бизнес идеяларды іске асыруға биыл 204 грант беру жоспарланып, толығымен орындалды. Басты мақсат – әлеуметтің әлеуетін арттыру. Ел халқының әл-ауқатын көтеріп, төменгі күнкөріс деңгейіндегі тұрғындардың тұрмысын жақсартуға бағытталған мемлекеттік бағдарламалар өз жемісін беріп жатыр. Өткен жылы Жарма ауданының тұрғыны, көп балалы ана Индира Еременко жаңа бизнес идеяларды іске асыру үшін берілетін қайтарымсыз грантқа қол жеткізіп, кәсібін ашқан болатын. Ол өзіне-өзі қызмет көрсететін көлік жуу орнын ашып, грант қаражатына қажетті құрал-жабдықтар сатып алған. Индира Турсунмухамедқызы бүгінде кәсібін дөңгелетіп, нәпақасын тауып отыр.
— Бұл орын көлік жууға өте қолайлы. Өзіміз көлігімізді жуып аламыз, қызмет бағасы қалтамызға қолайлы. Кәсіпкердің ісіне сәттілік тілеймін. Өркендей берсін. Үлкен қалалардағы сияқты уақыт талабына орай бұдан өзге де қызмет көрсету орындары ашылып, ауылымыз көштен қалмай дами берсін. Жергілікті азаматтар кәсіп бастап, халықты жұмыспен қамтып жатса жаман ба? – дейді ауыл тұрғыны Е.Серікбаев.
Нарық бір орында тұрған жоқ және бизнеске жаңа идеялар қашанда керек. Бастауыш кәсіпкерлердің бизнес-идеяларын қарау кезінде комиссия мүшелері нарықтағы сұранысты, жобаның тиімділігін және бәсекеге қабілеттілігін зерттейді.
Жобасы қолдауға ие болған жандардың бірі — Гүлниса Уәлиқызы. Курчатов қаласының тұрғыны ІІІ топ мүгедектігі бар Гүлниса Уәлиқызы өткен жылы «Жұмсақ балмұздақ, тәтті мақта және попкорн сату» бизнес жобасын іске асыруға 400 АЕК көлемінде қайтарымсыз грант алып, өз ісін бастаған.
Семей қаласы бойынша айтатын болсақ, алғашқы лекте 32 адам грант қаржысын алса, осы жолы 159 өтінім түсіп, 53 грант берілді.
Ай-Керім СӘРСЕНҚАЛИ, «Semeı tańy»
