2013 жылдың 23 желтоқсаны күні Семей қалалық әкімдігінің үлкен мәжіліс залында қала әкімі Айбек Мүталапханұлы Кәрімовтың жетекшілігімен мемлекеттік қызметкерлерге арналған «Қазақстан Республикасынының діни қызмет аясындағы мемлекеттік саясаты» тақырыбында аппараттық сабақ болып өтті.
Тыңдаушылардың қызығушылығын тудырған танымдық дәрісті Шығыс Қазақстан облысының дін істері жөніндегі басқармасының басшысы Манарбек Әзімбекұлы Мұхаметжанов оқыды.
Дәріскердің сөзіне қарағанда 2011 жылы қабылданған «Діни қызмет істері және діни бірлес-тіктер туралы» жаңа Заң діни сеніміне қарамастан әр адамның тең құқықтығын, Исламның Ханафи мазһабы бағыты мен православтық христиандықтың халықтың мәдениеті мен рухани дамуындағы рөлін мойындайды, сонымен бірге Қазақстан халқының рухани мұраларымен үндесетін өзге де діндерге құрметпен қарайды.
Жаңа заң бойынша, 2012 жылы республика көлемінде діни бірлестіктер қайта тіркеуден өтті. Біздің облыста қайта тіркеуге дейін 365 бірлестік болса, бүгінгі күні 11 конфессияны құрайтын бірлестік саны 303. Олардың ішінде 193 ислам, 40 парвославтық, 6 католиктік, 61 протестанттық, 1 иудей, дәстүрлі емес екі бірлестік бар. Жалпы діни бірлестіктер саны 24 пайызға қысқарған.
Сонымен бірге, Манарбек Әзімбекұлы діни экстремизмнің бой көрсетуімен күрес, олардың алдын алу жайлы шаралар туралы сұрақтарға жауап беріп, мемлекеттік қызметкерлерді радикализм, экстремизм және терроризмнің барлық түрлеріне қарсы бірігіп жұмыс атқаруға шақырды.
Жиын соңында тыңдаушылар өздерін қызықтырған сұрақтарын қойып, тиісінше жауаптарын алды.
Семей қалалық ішкі саясат бөлімінің ақпараттық секторы.
