Республика күніне орай Жарма ауданының Бірлік ауылында да жаңа баспаналардың кілттері табысталды.
Бүгінде Жарма ауданында жаңа тұрғын үйлердің құрылысы қарқынды жүріп жатыр.
Республика күні қарсаңында «Қуатты өңірлер – ел дамуының драйвері» жалпыұлттық жобасы аясында өңірде тұрғын үй кезегінде тұрған азаматтарға 2 пәтерлі үш үйдің кілттері табысталды. Салтанатты іс-шараға аудан әкімі Нұрлан Борсукбаев қатысып, жаңа қоныс иелерін құттықтап, ізгі тілегін білдірді.
— Құрметті жерлестер, Сіздерді бүгінгі қуаныштарыңызбен құттықтаймын. Халықтың басым көпшілігі үшін тұрғын үй – ең өзекті мәселе. Бұл түйткіл мемлекет тарапынан мүмкіндігінше шешіліп жатыр. Мұқтаж адамдарға жәрдем берілуде. Бүгінде ауданымыз бойынша 599 адам баспана кезегінде тұр екен. Олардың барлығына кезекпен мемлекеттік тұрғын үй қорынан салынған үйлерден беріледі. Жалпы, жыл басынан бері аудан тұрғындарына 30 пәтердің кілті табыс етілді,– деді аудан әкімі.
Жаңа пәтерге ие болғандардың бірі — Бірлік ауылының тұрғыны Маржан Бақлаева.
— Мен баспана кезегінде 5 жылдай тұрдым. Тұрғын үйіміз апатты жағдайда болды. Көмек пен қолдау көрсеткен барша жандарға алғысымды білдіргім келеді. Мереке қарсаңында баспаналы болып жатқан жерлестерімді құттықтаймын,- деді Маржан Бақлаева.
Салтанатты жиын аудандық мәдениет үйінің шығармашылық ұжымының концертімен жалғасты.
