Әлбетте, ғылыми — жаңашыл әдістер өндіріс көлемін арттыруға серпін бермек. Ауылшаруашылығы саласын дамытуда ғылым мен іс – тәжірибені ұштастыру оң пайдасын тигізеді. Бұл орайда Семей қаласының Шәкәрім атындағы мемлекеттік университетінде «Агротехнопарк» зертханаларының ашылуы — Семей өңірі үшін айтулы оқиға. Бұдан былай өңірдің ауылшаруашалығы саласы енді ғылыми негізде дамитын болады. Өткен аптада аталмыш университеттің ғалымдары БАҚ өкілдеріне жаңадан ашылған және қазіргі таңда егін шаруашылығы, малшаруашылығы саласында жұмыс істеп тұрған жалпы жиыны 18 зертхананы таныстырды.
18 зертхананың ішінде тұқымдардың сапасына баға беретін зертхана жұмысы қарқынды түрде жүргізілуде. Ғалымдардың айтуынша, бұл жердегі жаңа құрылғылардың зерттеу мүмкіндіктері айтарлықтай жоғары. Егін егіп, табыс тауып жүрген шаруашылықпен айналысушылар үшін зертхана жұмысы — таптырмайтын көмек.
— Мұнда тұқымның сапасы, ылғалдылығы және арам шөптер мен зиянкестерден тазалығы анықталады. Сонымен қатар жобалар дайындалып, ауыл шаруашылығымен, оның ішінде егін шаруашылығымен айналысу тұрғысынан кеңестер беріліп, ұсыныстар айтылады. ҚР Ауыл шаруашылығы министрлігі арқылы өнімге кедергі келтіретін шөптер мен дәнге қауіп төндіруші зиянкестермен күрес тұрғысынан екі бағыттағы жұмыс ұсынылды. Бізде өңірімізде өндірілетін барлық дәнді дақылдардың түрлері зерттеледі. «Лазарев», «Лана», «Балке» сынды Бесқарағай ауданының шаруа қожалықтарымен тығыз байланыс жасаймыз. Олар егін егу, мал өсірумен айналысады. Студенттер мен магистранттар егін алқаптары мен мал жайылымдарында, зертханада тәжірибе жасау, жұмыс істеу арқылы зерттеу жұмыстарын орындайды, — деді аграрлық факультеттің деканы Сәуле Сейілғазина.
{jcomments on}Агротехнопарк құрудағы басты мақсат ауылшаруашылығы саласында ғылыми-зерттеу базасын қалыптастыру, салада инновациялық әдістерді қолдануды дамыту, тамақ өнімдері және қайта өңдеудің білім — ғылым базасын құру болып табылады. Ауылшаруашылығы саласының бағыттарын қарастырған кезде мал өсіру, өсімдік, құс өсіру, омарташылықпен айналысу сынды пайда әкелер бағыттарын назарға алған жөн. Мұнда шаруа қожалықтары бизнес өкілдерімен, мемлекет қызметтерімен ортақ жоба аясында бірлесе жұмыс жасайды. Бұл тек инновацияны дамытып қана қоймай, студенттер мен магистранттардың ғылыми жұмыс, зерттеу жұмыстарымен айналысуларына мүмкіндік берері сөзсіз.
-Университеттің басты миссиясы – өңіріміздің аграрлық секторын дамыту, оның экономикасын көтеру. Бұл үшін жаңа технологиялар мен біздің ғалымдар дайындаған жоба жұмыстары үлкен маңызға ие. Қазіргі таңда ҚР Білім және ғылым министрлігінің 13 жобасын орындадық. Үстіміздегі жылы ҚР Ауылшаруашылығы министрлігінің ғылыми-зерттеу жұмыстарын жүзеге асырамыз. Ет-сүт бағытындағы малды асылдандыру және мал ауруларының алдын алу үшін, 37 млн. теңге қаражат бөлінді. Сонымен қатар облыстық ауылшаруашылығы басқармасының тапсырысы бойынша 2 жоба әзірлеп, ШҚО шаруа қожалықтарымен 25 келісімшарт жасастық, сонымен қатар АШ министрлігінің тапсырмасы аясында аймағымызбен қатар, Павлодар, Ақмола сынды облыстармен тығыз байланыстамыз,- деді Семей қаласының Шәкәрім атындағы мемлекеттік университетінің ғылыми-инновациялық жұмыстар және стратегиялық даму жөніндегі проректоры Тұмарбек Әмірханов. Сонымен қатар проректор оқу орны «Агробизнес-2020» бағдарламасы бағытында жұмыс жасап, түлектердің дербес түрде еңбектерін бастап, кәсіпкерлікпен айналысуға баулитынын да атап өтті.
Бір сөзбен айтсақ, «Агротехнопарк» ауылшаруашылығы саласын дамытуға бағыттал-ған. Алдағы уақытта да инновациялық әдістер көмегімен, зертханалары арқылы тұқымдардың өнімділігін арттыруға, мал басы санын көбейту үшін оларды асылдандыруға өзіндік үлесін қосу жоспарланып отыр.
Әйгерім СӘРСЕНҒАЛИ,
«Семей таңы».
