Қазақстан полициясы 2015 жылдың қаңтар айында халықтан травматикалық және газды қару-жарақты сатып алуды бастайды. Естеріңізге сала кетейік, қазақстандықтарға травматикалық қару-жарақ ұстауға тыйым салатын заң осы жылдың сәуір айында қабылдан-ған болатын. Өткен аптада осы өткізілгелі отырған акция жайлы Семей қалалық ІІБ баспасөз жиыны өтіп, БАҚ өкілдеріне кеңінен ақпарат берілді.
Семей қалалық ІІБ лицензия және қару айналымын қадағалау тобының аға инспекторы, полиция майоры Талғат Дюсуповтың айтуынша, ішкі істер органдары жеке тұлғаларға тіркелген жарақат салатын патрондармен ату мүмкіндігі бар ұңғысыз атыс қаруын, газды қаруды қабылдауды 2015 жылдың 1 қаңтарынан бастап 2016 жылдың 1 қаңтарына дейін жүргізетін болады. Ерікті түрде тапсырылған травматикалық қарулардың өтеуі осы мақсатқа көзделген республикалық бюджеттің қаражаты есебінен жүргізіледі.
— ҚР Ішкі істер министрлігі жарақат салатын патрондармен ату мүмкіндігі бар ұңғысыз атыс қаруын, газды қаруды сақтауға және алып жүруге ішкі істер органдарының тиісті рұқсаты бар жеке тұлғалардың қаруды ерікті түрде өтелуі негізінде тапсыру қағидасын әзірледі. Осы мүмкіндікті пайдалана отырып, қала тұрғындарына аталмыш қаруларды көрсетілген мерзім аралығында тапсыруды сұраймыз. Алдағы уақытта ол қаруларға рұқсат мерзімі ұзартылмайды. Яғни қарулар тек күзет қызметінде ғана пайдаланылатын болады, — дейді Т.Дюсупов.
Жоғарыда көрсетілген мерзім аяқталғаннан кейін, яғни 2016 жылдан бастап, аталмыш қаруларды пайдалану заңсыз болып саналады және қаруды пайдаланғандар қылмыстық жазаға тартылады. Бүгінде қаруларға мемлекет есебінен жасалатын төлем құны анықталу үстінде және оның мөлшері келер жылға дейін нақтыланбақ. Айта кетуіміз керек, 2000 жылдары травматикалық қарулар мен газды қарулар ішкі істер органдарының қандай да бір рұқсатынсыз сатылымға түсті. Кейін, 2008 жылдан бастап, ішкі істер органдарына оларды тіркеуге ала бастады. Ал келер жылдан бастап оларды пайдалану арнайы күзет қызметінен өзге азаматтарға заңсыз саналады. Бұл ретте сала мамандары, тіркелмеген қарулары бар азаматтар жыл соңына дейін тұрғылықты мекенжайлары бойынша ішкі істер органдарына келіп, қаруларын тіркелулері қажет екенін, олай болмаған жағдайда, қаруларды акция аясында өткізе алмайтыны және жарамсыз саналатынын айтады.
{jcomments on}Шараның өтуінің негізгі себебі азаматтардың аталған қаруларды мақсатты қолданбауынан туындап отыр. Сараптама көрсетіп отырғандай, соның салдары елімізде ауыр немесе аса ауыр қылмыстардың орын алуына түрткі болған. Оның үстіне қарулар 18 жасқа толған еліміздің кез келген азаматына қолжетімді болуда. Бұдан өзге, газ тапаншаларын атыс қаруына айналдыратын жағдайлар да жиі орын алады екен.
— Семей қаласы бойынша ұңғысыз атыс қаруы мен газды қарудың 700-ге жуық тіркелген түрі бар. Акция барысы жайлы жыл бойы қала тұрғындарына ақпарат беріп келеміз. Бүгінгі күні қару иелерінің 80 пайызы аталмыш шараның жүргізілетінін біледі. Ал акция шеңберінде иесіне қаруды сатып алған құнының 70 пайызы төленеді. Оның нақты мөлшері жыл соңына дейін белгілі болуы керек, — дейді Семей қалалық ІІБ лицензия және қару айналымын қадағалау тобының аға инспекторы, полиция майоры Талғат Дюсупов.
Асан МЫРЗАХАНОВ,
«Семей таңы».
