{jcomments on}Мұражай — мәдениет пен өнердің ұйыған ордасы. Біз құнды жәдігерлер мекеніне қарап, өткенімізге үңілеміз, тұтас елдің тарихын, мәдениеті мен өнерін санамызға тоқимыз. Осындай мұражайдың бірі — Семейдің облыстық тарихи-өлкетану музейі. Мұражай сонау ерте заманнан ата-бабаларымыздан қалған мұраларды сақтап, ел өмірін көрсетуде айтарлықтай жұмыс жасап келеді. Жуырда музейдің «Жыл жәдігерлері» атты көрменің ашылу салтанаты өтті. Аталған көрмеде жыл қорытындысы бойынша 2014 жылы музей қорына қабылданған мыңнан астам жәдігерлердің ішінен ерекше деп танылғандары ұсынылды.
Өлкетанушылар, қаламыздағы мұражай қызметкерлері мен БАҚ өкілдерінің басын қосқан көрменің ашылуында сөз алған музей директоры Бекен Теміров жылқы жылының табысты жыл болғанын, осы жылы мұражай қоры көптеген жәдігерлермен толыққанын ерекше атап өтті.
— Жыл қорытындысына осындай көрме ұйымдастыруды жөн деп шештік. Жыл бойы музей қорына 1250 жәдігер қабылданды. Бұл көрсеткіш музейіміз үшін айтарлықтай жетістік деп айтуға болады. Алайда құнды заттарды сақтайтын бізде орын жоқ. Көп жәдігер ал-ғымыз-ақ келеді. Бірақ сақтауға келгенде бізде үлкен мәселе туындайды. Дегенмен биыл осынша жәдігерге қол жеткіздік. Музейдің өңірімізде үш аймақтық филиалы жұмыс жасайды. Сол аумақтарға өзіміздің біраз жәдігерлерімізді сақтауға жіберіп отырмыз. Соның арқасында қорымыздан біраз салмақ түсіп отыр. Музей үшін қор жинақтау өте маңызды. Өйткені қор жеткілікті болса халыққа көрсететін мүмкіндікте көп болады, — деді Бекен Теміров.
Көрмеде жерлес ғалым Т.Аманов, сазгер Б.Жамақаев, ақын A.Мана- баевтардың құжаттары, фотосуреттері, жеке заттары, өлкетанушы B.Кашляктың еңбектері мен кітаптары, журналист Ф.Занариннің тапқан қызықты жәдігерлері, Кеңес Одағының батыры Н. Силиннің Ұлы Отан соғысы кезіндегі заттары — неміс пышағы, белдігі мен планшеті қойылған. Бұған қоса жеке мұрағаттар бойынша түскен жәдігерлер жинақталып, көпшілікке ұсынылыпты. Айта кетейік биылғы жылы музей «Өлкетанушылар мен саяхатшылар», «Олардың есімдерімен көше аттары аталды», «МАИ тарихы», «Киелі өнер ордасы», «Сымдар, жолдар, толқын — арналар…» тақырыптарында ұйымдастырылған көрмелер жайлы мәліметтер де осы жерден табылып отыр.
Асан МЫРЗАХАНОВ, «Семей таңы»
