Кез келген мекеменің тазалығы мен тәртібі – оның бет-бейнесі. Үшбиік ауылының Ақтайлақ би атындағы орта мектебіне бара қалсаңыз, мұнтаздай таза,
жинақы ауласын көріп, көзің қуанады. Бұл тазалықтың артында үлкен еңбек жатыр. Көп жағдайда біз оны байқай бермейміз.
Мектеп ауласын сыпырып, тазалықты қадағалайтын — Бақытбек Қалиев деген азамат. Ол Үшбиік ауылының Ақтайлақ би атындағы орта мектебінде аула сыпырушы болып 15 жылдан бері еңбек етіп келеді.
Бақытбек аға жұмысына таңертең ерте кіріседі. Ауланы қоқыстардан тазартады, қыс мезгілінде қар күреп, мұз ойып, мектеп айналасын күтіп ұстайды. Кей кездері тіпті кішігірім жөндеу жұмыстарына жәрдемдесіп жатады. Оқушыларға көмектесіп, кеңес беріп жүреді.
Әр мектептің өзіндік тарихы мен қалыптасқан дәстүрлері болады. Сол дәстүрді қалыптастырушылардың қатарында мұғалімдер ғана емес, білім ордасының тазалығына жауапты жандар да бар. Сондықтан еңбегі елене бермейтін аула сыпырушыларға да алғыс айтып, құрмет көрсету па-
рыз. Олардың адал еңбегі – біздің күнделікті жайлылығымыз бен қауіпсіздігіміздің кепілі. Қоғам үшін ұстаздың, дәрігер мен өрт
сөндірушінің маңыздылығы қандай болса, аула сыпырушы мен еден жуушының да маңыздылығы дәл сондай.
Өзгелерге көмектесуді өмірлік ұстанымына айналдырған адамдар болады. Мұндай азаматтар әр ауылда бар. Жерлестерінің қамын ойлап, әрдайым жанынан табыла білетін, қайтарымын күтпей, риясыз жақсылық жасайтын олар ауылдың нағыз жанашырлары. Біреуінің үйіне отын түсіріп берсе, енді біріне ауласын реттеу ге көмектеседі, шаруасын шешіп береді. Тағы бірде ауруханаға жете алмай қиналған адамдарды өз көлігімен апарып тастайды. Мұндай қайырымды азаматтар – қоғамның нағыз тірегі. Осындай жандардың еңбегі мен жанашырлығы — ауыл тұрғындары үшін үлкен қолдау. Олар жастарға еңбекқорлық пен қайырымдылықтың үлгісін көрсетеді. Ауылда қиын жағдайға тап болған кез келген жан олардың есімін біледі және көмек сұраудан қымсынбайды. Сондай жандардың бірі – осы Бақытбек аға. Бақытбек Қалиев секілді жанашыр жандар көпке үлгі болып, ауылдағы ынтымақ пен бірлікті нығайтуға өз үлестерін қосады. Олар үшін ең үлкен марапат — ауыл тұрғындарының алғысы мен құрметі.
Бақытбек аға — сегіз қырлы, бір сырлы азамат. Ат баптайды, аңшылық пен құсбегілік өнерге де жақын. Қамшы өруді де жақсы меңгерген. Қамшының түрлерін, ерекшеліктерін жақсы білетін ол бұл қолөнер түрін жастарға насихаттап жүр. Қамшы тек мал айдайтын құрал емес, қазақы дәстүрде тәрбие құралы, батырлардың серігі, билердің символы болған. Шебер мектепте үзіліс уақытында және сыныптан тыс шараларда оқушыларға қамшы
өрудің әдістерін үйретіп келеді.
Бақытбек аға жұбайы Мейізгүл апай екеуі екі ұл өсіріп, келін түсіріп, немере, шөберелерінің қызығын көріп отыр.
