Қаңтар айынан бастап зейнетақы төлемдерінің мөлшері 8,5 % — ға артты. Бұл туралы Өңірлік коммуникациялар қызметі алаңында өткен баспасөз маслихатында Абай облысы бойынша халықты әлеуметтік қорғау саласындағы реттеу және бақылау комитеті департаменті басшысының орынбасары Әсем Ахметова мәлімдеді.
Спикердің айтуынша , қазіргі таңда елімізде 2,5 млн. ға жуық зейнеткерді әлеуметтік қамтамасыз етуге қаражат бөлініп отыр.
-Ағымдағы жылдың қаңтар айынан бастап жасына байланысты жаңадан тағайындалған зейнетақы төлемдерінің мөлшерін есептеу үшін ескерілетін ең жоғары табыс 55 АЕК-ні құрайды. Ал ең төменгі зейнетақы мөлшері 62 771 теңге. Бұдан бөлек ең төменгі күнкөріс деңгейі 46 228 теңге болып бекітілді. Сонымен қатар, базалық зейнетақының ең төменгі мөлшері 32 360 теңге, — деп атап өтті Әсем Ахметова.
Атап өтсек, мүмкіндігі шектеулі жандар және асыраушысынан айрылу жағдайына байланысты мемлекеттік әлеуметтік жәрдемақылардың мөлшері белгіленген инфляция деңгейіне – 6,5%-ға артқан.
-Өткен жылы 1 топтағы мүмкіндігі шектеулі жандар алатын жәрдемақы 95 мыңнан асса, ал биыл бұл сан 6 мың теңгеге көбейген. Дәл сондай 2 топтағы жандар үшін 76 мың теңгеден асса , биыл 81 мыңнан аспақ. Сонымен қатар, 3 топтағы жандардың да жәрдемақысы өскен. Былтыр олар 52 мың теңгеден артық қаражат алған болса , биыл 3 мың теңгеге артып отыр,- деді департамент басшысының орынбасары.
Сондай-ақ, зиянды еңбек жағдайларында еңбек еткен жұмысшыларға арнаулы кәсіптік төлем ең төменгі күнкөріс деңгейі мөлшерінің ұлғаюына байланысты республикалық бюджеттен екі ең төменгі күнкөріс деңгейіне 92 456 теңгеге арттырылды .
— Бұдан бөлек, АЕК мөлшерінің өсуіне байланысты да көптеген жәрдемақылар мен әлеуметтік төлемдер артты. Осыған сәйкес, ағымдағы жылы Күміс алқа иеленген аналардың жәрдемақы мөлшері 25 641 теңгені, Алтын алқа, Батыр ана және Ана даңқы ордендерімен марапатталған көп балалы аналардың жәрдемақысы 29 097 теңгеге жеткен. Баланың туылуына байланысты бірінші, екінші, үшінші балаға 149 416 теңге, төртінші және одан кейінгі балаларға 247 716 теңге мөлшерінде жәрдемақы төленеді,- деп қорытындылады спикер.
