Елімізде шағын кәсіпкерлікті қолдауға ерекше көңіл бөлініп отырғаны белгілі. Өйткені орта және шағын кәсіпкерліктің өркендеуі ел экономикасының дамуына жағымды әсер етеді. Сондықтан да мемлекет тұрғындардың бизнес жобаларының жүзеге асуына қолдау көрсетіп келеді.
Кәсіпкерлікке бейімделу — бүгінгі күннің басты талабы. Себебі табыс кілтін тауып, ерінбей еңбектенгендердің жағдайы жақсы болмақ. Бұған қазіргі жастардың көзі жеткен. Ал қазір, жоғарыда айтып өткеніміздей, кәсіп ашамын деген адамға мемлекет тарапынан берілетін мүмкіндік те, қолдау да бар. Мемлекеттік бағдарламалардың игілігін көріп отырған азаматтардың саны біздің өңірімізде де жыл сайын артып келеді. Олардың қатарында Аягөз ауданының тұрғыны Гүлнар Рүстенбаева да бар. Мемлекеттен грант алып, шағын кәсіп бастаған ол бүгінгі күні жастарға үлгі болуда.
— Кондитер өнімдерін жасағанды қатты ұнатамын. Бала күнімнен тәтті-дәмділер пісіруге әуес болдым. Теледидар мен журналдардан түрлі рецептерді жазып алатынмын. Менің пісірген тәттілерімнің дәмін татқандар ұнатып, мақтап жататын. Сөйтіп, өз отбасым үшін ғана мерекелерде, той-томалақтарда әзірлеп жүрдім. Бірде өзімнің қолымнан келетін істі неге кәсіпке айналдырмасқа деген ой келді. Ниет болса, қазір мемлекет тарапынан қолдау көп. Өзім асыраушысынан айырылған жалғыз басты анамын, 3 балам бар. Жасым қырыққа келді. Аудандық жұмыспен қамту орталығының қызметкерлері қайтарымсыз грант алу жолдарын түсіндіріп, кәсіпкерлік негіздерін оқуға кеңес берді.
Расында да, қолға алған ісіңнің табысты болуы қаржыға ғана тірелмейді, іс-әрекет жоспарың, кәсіпкерлік саласында білімің болуы қажет. Кәсіп жүргізудің қыр-сырымен танысқан соң бизнес жоба жасадым, былтыр ақпан айында 13 800 000 теңге грант қаражатына ие болып, кондитерлік өнімдер шығаратын цехты жалға алдым, торт пісіруге арналған жабдықтар сатып алып, істі бастап кеттім. Бүгінде екі адамды жұмыспен қамтып отырмын, — дейді кейіпкеріміз.
Қазіргі таңда Гүлнардың өнімдері аудан көлемінде таныла бастапты, оның қолынан шыққан торттарды, бәліштер мен тәтті тоқаштарды тойларына, мерекелік дастарқандарына қою үшін тапсырыс беретіндер көбейіп келеді екен. Кәсіпкер тапсырыс берушілердің көңілінен, талғамынан шығу үшін тек табиғи сапалы өнімдерді ғана пайдаланатынын айтады. Гүлнардың тәтті бөлкелері мен торттары шай дастарқанының сәніне айналып үлгерген. Кондитердің бір торты салмағы мен көлеміне қарай 3500 теңгеден 7000 теңгеге дейін бағаланады. «Вупи-пай», «Қызыл барқыт», «Наполеон», «Сүтті қыз» сияқты торттардың түр-түрі бар. Кондитер цехында тұтынушының тапсырысы бойынша печенье, бәліш, самса, тәтті бөлкелердің сан түрі, тіпті түріктің пахлавасына дейін дайындалады. Кейіпкеріміз алдағы уақытта кәсібін кеңейтуді ойластырып жүр екен. Ол үшін мемлекеттен жеңілдетілген несие алуға ниетті.
— Менің ендігі арманым — үлкен кондитер цехын ашып, кәсібімді кеңейту. «Еңбек етсең ерінбей, тояды қарның тіленбей» демекші, адам алдына қандай да бір мақсат қойып, соған бар ынтасымен кіріссе, бәрі өз ретімен орындалады. Ақырындап жұмысым жүріп жатыр. Осы кәсібіммен балаларымды асырап отырмын. Кондитерлік дүкен, студия ашу да ойымда бар. Жастарды осы кәсіпке баулып, қыр-сырын үйреткім келеді. Өзгеше рецептер ойлап тауып, өз брендімді қалыптастырсам деймін. Кәсібімді кеңейте алып жатсам, тағы біраз адамды жұмыспен қамтуға мүмкіндік туады. Осындай қолдау көрсетіп отырған мемлекетіме алғысым шексіз, — дейді кәсіпкер.
Дәмі тіл үйіретін тәттілерді пісіріп, жерлестерінің көңілін жаулап алған кейіпкеріміздің алға қойған мақсаты айқын, қадамы нық. Ендеше, кәсіпкердің арманының орындалуына біз де тілекшіміз. Кәсіптің көзін тауып, берекелі тұрмыс кешіп отырған осындай іскер жандар – мемлекетіміздің өркендеуінің кепілі.
Сымбат ҚАЙРАТҚЫЗЫ, «Semeı tańy»
