Semeytany.kz – Абай облысының әкімі Берік Уәли Жаңасемей ауданына қарасты Қайнар ауылына жұмыс сапарымен барып, бірқатар әлеуметтік нысандардың жай-күйімен танысты. Сапар барысында жылу қазандықтарының жаңартылуы, жаңа балабақшаның ашылуы және өрт сөндіру бекетінің жұмысы қаралды.
Қайнар ауылы облыс орталығынан шамамен 300 шақырым қашықтықта орналасқан. Аймақ басшысы ең алдымен Сапарғали Бегалин атындағы жалпы орта мектептің жылу қазандығын аралады. 1974 жылы салынған білім ордасы мектеппен қатар ауылдық әкімдік ғимаратын және мәдениет үйін жылумен қамтамасыз ететін орталық қазандыққа қосылған. Мұнда қуаты әртүрлі төрт қазандық орнатылған, соның екеуі биыл толық жаңартылды.
Бұған дейін, шамамен жеті ай бұрын, облыс әкімі Қайнар ауылына арнайы келіп, қазандықтың тозғанын көріп, әкімдік тарапынан қолдау көрсетілетінін айтқан еді.
– Облыс әкімінің сәуір айында Қайнарға жасаған сапарынан кейін ұзақ жанатын жаңа пештер орнатылды. Қазір мектеп те, өзге мекемелер де толыққанды жылумен қамтылып отыр. Қиындықтың бәрі артта қалды. Мектеп ұжымы мен ауыл тұрғындары атынан аймақ басшысына алғысымызды білдіреміз, – деді Сапарғали Бегалин атындағы орта мектеп директоры Маржан Жақыпова.
Сапар аясында Берік Уәли «Айриза» балабақшасының жұмысымен де танысты. 50 орынға есептелген шағын орталық екі топтан тұрады. Балабақша Қараөлең ауылдық округі әкімдігінің жалпы аумағы 500 шаршы метр болатын ғимаратын жалға алып отыр. Жылыту жүйесі мектеп пен мәдениет үйімен бірге орталықтандырылған.
«Айриза» балабақшасы – Қайнар ауылының тумасы Перизат Бағдатқызының жеке бастамасының нәтижесі. Мұнда балалардың тәрбие мен білім алуына барлық жағдай жасалған. Әр топ жас ерекшелігіне сәйкес жабдықталған, жатын бөлмелер бейнебақылау жүйесімен қамтылған. Аулада кең және тартымды ойын алаңы бар. Балабақша толық жұмыс режиміне көшкен соң балалар күніне үш рет тамақтанады, таза ауада серуендейді, құм терапиясы, дамытушы ойындар, театрландырылған қойылымдар мен түрлі тәрбиелік шаралар ұйымдастырылады. Ұжымда тәжірибелі педагогтар, медицина қызметкері және қосымша мамандарды қоса алғанда, 15 адам еңбек ететін болады.
Облыс әкімі мектепке дейінгі тәрбие нысанының шалғайдағы ауыл үшін ерекше маңызды екенін атап өтті.
– Қайнар ауылында 1996 жылдан бері алғаш рет балабақша ашылып отыр. Ғимарат жарық, кең, әдемі, бүлдіршіндер үшін барлық жағдай қарастырылған. Мемлекеттік тапсырыс аясында әкімдік тарапынан тиісті қолдау көрсетілетін болады, – деді Берік Уәли.
Сонымен қатар аймақ басшысы елді мекендегі өрт сөндіру бекетінің жұмысын көрді. Жақында қайта жаңғыртудан өткен ғимаратта қазіргі кезде бес қызметкер жұмыс істейді. Өрт сөндіру постының қызмет көрсету аумағына Қайнар ауылы, Қараөлең бөлімшесі және 30-дан астам шаруа қожалығы кіреді. Жалпы 350 үй мен 1 398 тұрғын осы бекеттің қорғауында.
Посттың қорғауындағы маңызды әлеуметтік нысандар қатарында дәрігерлік амбулатория, мектеп, балабақша және жергілікті атқарушы орган ғимараттары бар. Өрт сөндіру бекетінің тактикалық мүмкіндіктері тұрмыстық және дала өрттерін сөндіру кезінде төтенше жағдайлар департаментінің негізгі күштері мен техникасын сумен қамтамасыз етуге мүмкіндік береді. Нысан электр желісіне қосылған, ұзақ жанатын қазандық арқылы жылытылады. Қайнар ауылының аумағында су алуға арналған төрт өрт гидранты орнатылған.
Сапар қорытындысында облыс әкімі бұрынғы аудан орталығы Қайнардың әлеуеті жоғары елді мекен екенін атап өтіп, ауылды дамытуға бағытталған жобалар алдағы уақытта да жүйелі түрде жалғасатынын айтты.
