Абай облысының әкімі Берік Уәли Қарттар күніне орай және Мұғалімдер күні қарсаңында Семей қаласында тұратын ардагерлердің үйлеріне барып, қос мерекемен құттықтады.
Аймақ басшысы алдымен ұлағатты ұстаз, білім саласының ардагері Төлеу Анапьяновамен кездесті.
Төлеу Қажиқызы 1935 жылы Көкпекті ауданында дүниеге келген. Семейдегі М.Әуезов атындағы педагогикалық училищені тәмамдап, бастауыш сынып мұғалімі мамандығын алған. Ол 40 жылға жуық уақыт Ақсуат ауданындағы мектептерде еңбек етіп, жүздеген шәкіртке білім мен тәрбие берген. Еңбегі мен кәсіби біліктілігі үшін КСРО-ның «Аға мұғалім» атағына ие болған.
Ардагер ұстаз жұбайы Сләмбек Әбілмәжіновпен бірге 10 бала тәрбиелеп өсіріп, «Батыр ана» атағын алған. Сондай-ақ Тарбағатай ауданының «Құрметті азаматы» атанған. Жалпы еңбек өтілі 40 жылдан асады.
Берік Уәли еңбек саласының ардагері Қанатқали Құндақовтың да шаңырағына барып, мерекемен құттықтады.
Қанатқали Құндақов 1946 жылы Абай ауданында дүниеге келген. Еңбек жолын Архат ауылында жұмысшы болып бастаған. Кейін Семей педагогикалық институтының тарих факультетінде білім алып, мектепте мұғалім болып еңбек етті. Әр жылдары білім, мәдениет, еңбек қатынастары, көші-қон және әлеуметтік қорғау салаларында түрлі қызметтер атқарған. Ардагердің жалпы еңбек өтілі 42 жылды құрайды.
Кездесу барысында облыс әкімі ардагерлерге ел дамуына қосқан үлестері үшін алғыс айтып, олардың өмір жолы мен еңбегі кейінгі ұрпаққа үлгі екенін атап өтті.
«Қартын сыйлаған елдің қазынасы мол» деген ұлағатты сөз бар. Егемен еліміздің қалыптасуы мен мемлекеттің дамуына аға буын өкілдерінің қосқан үлесі зор. Сіздер – өнегелі өмір тәжірибесінің қайнар көзісіздер. Өңіріміздің өркендеуі үшін сіңірген еңбектеріңізге ризашылығымды білдіремін», – деді Берік Уәли.
Кездесу соңында Төлеу Қажиқызына «Абай облысына сіңірген еңбегі үшін» төсбелгісі табысталды. Ал Қанатқали Құндақовқа аталған марапат 1 қазанда ардагерлерге арналған салтанатты жиында берілген болатын.
