Semeytany.kz — Абай облысының әкімі Берік Уәли Жаңасемей ауданының Қайнар ауылында тұрғындармен кездесіп, өңірдің әлеуметтік-экономикалық дамуы, шешімін күткен мәселелер және алдағы жоспарлар туралы айтты. Жиынға ауданның ауылдық округтерінен келген тұрғындар қатысып, өз ұсыныс-пікірлерін жеткізуге мүмкіндік алды.
Кездесудің басында Жаңасемей ауданының әкімі Нұржан Әбдікәрімов 2024-2025 жылдардағы негізгі әлеуметтік-экономикалық көрсеткіштерге тоқталып, атқарылып жатқан жұмыстар туралы баяндады.
Жаңасемей – мал және егін шаруашылығына бейім аудан. Биыл мұнда 14,9 мың гектар алқапта егін жиналды. Әсіресе картоп, көкөніс және бақша дақылдарына сұраныс жоғары. Аудан көкөніс өсіру бойынша облыстағы тірек аумақтардың бірі саналады. Облыс көлемінде ауыл шаруашылығы техникасын жаңарту бағытында 451 техника сатып алынса, «Кең дала – 2» бағдарламасы аясында өңір шаруаларына 9,5 млрд теңге жеңілдетілген несие берілген, оның 578 млн теңгесін жаңасемейлік диқандар игерді.
Ауданда құны 46,7 млрд теңгені құрайтын 6 инвестициялық жоба жүзеге асырылуда. Бұл жобалар ауыл шаруашылығы өнімдерін көбейтуге, жаңа жұмыс орындарын ашуға және өңдеу саласын дамытуға мүмкіндік береді. Жаңасемей аумағында 6,8 мың гектар жерге су үнемдеу технологиясы енгізілген. 2031 жылға дейін облыста осындай алқаптарды 88,2 мың гектарға дейін жеткізу жоспарланып отыр. Сонымен қатар ауданда қуаттылығы жылына 11,4 мың тонна ет өндіретін ірі ет комбинатының құрылысы жүріп жатыр. Инвестор 5000 басқа арналған бордақылау алаңын салуды да жоспарлауда.
Облыс көлемінде биыл инвестициялық жобалар саны 29-дан 97-ге өсті. Инвестиция көлемі 2,2 трлн теңгеден 3,5 трлн теңгеге дейін ұлғайды. Жыл соңына дейін барлығы 14 жоба іске қосылмақ. Жаңасемей ауданы бойынша жалпы құны 110,7 млрд теңгеге тең, 1 200 жаңа жұмыс орнын құруды көздейтін 9 жобаны жүзеге асыру жоспарланған.
Инженерлік инфрақұрылымды жаңарту бағытында да жұмыстар жүргізілуде. Облыс бойынша биыл 12 жылу көзі жаңартылып, 13,6 шақырым жылу құбыры ауыстырылды. Жаңасемей ауданының бірқатар ауылдарында жаңа су жүйелері салынып, ескі құбырлар кезең-кезеңімен жаңартылып жатыр. Қайнар және Алғабас ауылдарында орталық қазандықтар ауыстырылып, тұрғындардың жылу мәселесін тұрақты шешуге мүмкіндік жасалды.
Білім беру мен денсаулық сақтау саласы да назардан тыс қалған жоқ. Биыл Жаңасемейдің Приречный және Түрксіб мектептері күрделі жөндеуден өтті. Сонымен қатар 13 мектепке ағымдағы жөндеу жүргізілді. Оқу орындарына жаңа пән кабинеттері, жиһаздар, сондай-ақ оқушыларды тасымалдауға арналған автобустар сатып алынды. Абыралы аудандық ауруханасына стоматологиялық құрал-жабдық алынса, Жаңасемей ауданында 14 медициналық пункт салуға жобалық-сметалық құжаттама әзірленіп жатыр.
Кездесу соңында облыс әкімі Берік Уәли тұрғындардың ұсыныс-пікірлерін тыңдап, қойылған сұрақтарға жауап берді. Аймақ басшысы Қайнар ауылындағы Мәдениет үйіне жақын уақытта музыкалық аппарат пен LED-экран жеткізілетінін атап өтті.
– Аудан тұрғындарымен кездесуді бұрынғы аудан орталығы болған, Семейден 300 шақырым жерде орналасқан Қайнар ауылында өткізуді жөн деп шештік. Абыралы өңіріне бұған дейін арнайы келіп, әлеуметтік нысандарды аралап, ауылдардың тыныс-тіршілігімен таныстым. Жаңадан құрылған ауданның жағдайын, тұрғындарды алаңдататын өзекті мәселелерді жақсы білемін. Жол, ауыз су, жарықтандыру сияқты проблемалар кезең-кезеңімен шешілетін болады, – деді облыс әкімі.
Абыралы өңірінің тұрғындары аймақ басшысына ауылдарға көрсетіліп жатқан қолдау үшін алғыс білдірді.
– Абыралы ауданы таратылған 1997 жылдан бері мұндай деңгейдегі жиын болмаған шығар. Бүгін ауруханаға он жаңа компьютер келді, тағы басқа да жаңа жабдықтар беріледі деп естіп, қуанып жатырмыз. Мектептерге жаңа қазандықтар орнатуға көмектестіңіз. Қиыр жайлап, шет қонған өңірімізді назардан тыс қалдырмағаныңыз үшін тұрғындар атынан алғыс айтамыз, – деді Қайнар ауылының тұрғындары.
