Semeytany.kz — Абай облысының әкімі Берік Уәли Жаңасемей ауданының тұрғындарын жеке қабылдап, олардың инфрақұрылым мен мәдениетке қатысты ұсыныс-өтініштерін тыңдады. Қабылдауға келген азаматтар ауылдардың күнделікті өміріне тікелей әсер ететін бірқатар маңызды мәселелерді көтерді.
Қайнар ауылының тұрғыны Жәнібек Наурызбаев елді мекендегі қоқыс полигонын қоршау қажеттігін, жолдарға тұрақты қызмет көрсететін мекеме ашу, сондай-ақ жасөспірімдер жөніндегі учаскелік инспектор қызметін жандандыру жөніндегі ұсыныстарын жеткізді.
Ақбұлақ ауылының тұрғыны Думан Сайлауғалиұлы Әміре Қашаубаевтың 140 жылдық мерейтойын жоғары деңгейде атап өту, ауыл ішін жарықтандыру, абаттандыру және елді мекенге дейінгі жолды жөндеу мәселелерін көтерді.
Облыс әкімі Берік Уәли қабылдауда айтылған ұсыныстар мен пікірлердің барлығы мұқият қаралатынын атап өтіп, аудан әкіміне және тиісті басқармаларға нақты тапсырмалар берді.
Тұрғындарды қабылдау облыс әкімінің қабылдауынан бұрын басталған. Алдымен басқарма басшылары Жаңасемей ауданының тұрғындарын жеке қабылдап, олардың сауалдарына жауап беріп, шешу жолдарын түсіндірді.
