«ТАБЫСТЫ ОТБАСЫ» ЖОБАСЫНЫҢ ЕКІНШІ КЕЗЕҢІ БАСТАЛДЫ
Семейде «Табысты отбасы» пилоттық жобасының екінші кезеңі жүзеге асуда. 19 қаңтар күні осы әлеуметтік жобаның авторы Айжани Нұрланова қаладағы «Сәукеле» сән үйінде «Тігін ісі» бейіндік бағыты бойынша оқудан өтетін жобаның екінші кезеңінің қатысушыларымен кездесіп, әрқайсысымен жеке сұхбаттасты. Сонымен қатар қаладағы жұмыспен қамту орталығында оқу курсын «Бьюти индустрия» бейіндік бағыты бойынша тамамдаған қатысушылармен жүздесіп, сертификаттар табыстады.
Жадыра ТӨЛЕГЕНҚЫЗЫ,
«Семей таңы»
Айта кетейік, жобаның екінші кезеңі бойынша бүгінде 41 қатысушы бес бейіндік бағыт бойынша оқудан өтуде — тігін ісі, автоэлектрик, кондитерлік өнімдер, beauty саласы және әлеуметтік медиа менеджері.
Жоба жетекшісі Айжани Нұрланова және Абай облысы әкімдігінің өкілдері алдымен 18 қаңтар күні «Табысты отбасы» жобасының бірінші кезеңінің түлектері — екі көп балалы ананың үйіне барып, олармен жақынырақ танысты.
«Табысты отбасы» жобасының бірінші кезеңінің қатысушылары Куликовтер — көп балалы отбасы. Марина Куликова мен оның жұбайы бүгінде 11 бала тәрбиелеп отыр. Кездесу барысында Марина танымал кондитер болсам деген балалық шақтағы арманын осы жоба аясында жүзеге асыруға мүмкіндік алғанын айтып, ризашылығын жеткізді. Қазірдің өзінде көп балалы ана торттар мен тәтті бәліштерге тапсырыс алуда.
Ерекше қажеттіліктері бар бала тәрбиелеп отырған көп балалы ана Салтанат Азаматова да «Табысты отбасы» жобасына қатысып, СММ мамандығын меңгеріп шықты.
Айта кетейік, Марина Куликова, Салтанат Азаматова және жобаның алғашқы 27 түлегі жақында өз істерін дамыту үшін қажетті құрал-жабдықты тегін алады. Ал екінші лек қатысушылары оқуын жалғастыруда.
19 қаңтар күні жоба авторы Айжани Нұрланова, «Тігін ісі» бейіндік бағыты бойынша оқудан өтіп жатқан болашақ тігіншілермен «Сәукеле» сән үйінде кездесті.
— Мен бес қыздың анасымын. Жоба жайлы алғаш инстаграм әлеуметтік желісінен көріп, қатысып көруге бел байладым. Бұған дейін үйде тапсырыспен киімдерді кестелеумен айналысатынмын. Осы жоба аясында алған білімімді енді өз кәсібімді ашуға жұмсамақпын. Оқуды 4 қаңтарда бастадық. Курс бір айға жалғасады, әрі қарай тағы екі ай тәлімгерлер жетекшілік етеді. Осы аралықта уақытты бос өткізбеуді, мақсатымызға қарай сенімді түрде қадам басуды, өзімізді дамытуды үйрендік,- дейді Толғанай Серікболсынқызы.
Жоба қатысушылары қаламыздағы «Сәукеле» сән үйінің негізін қалаушы, дизайнер Жанна Баймұратовадан дәріс алуда.
— Мен Алматы технологиялық университетін тамамдағанмын. 22 жыл бұрын Алматы қаласынан Семейге келіп, бес жыл баламен үйде отырдым. Сол аралықта ақырындап тігін ісімен айналысып жүрдім. Сіздер білсеңіздер, ұсақ қол маторикасы ми жұмысының жақсаруына өте қатты әсер етеді. Сіздер тігін тігіп жатқанда, миыңыз басқа деңгейде жұмыс істей бастайды. Сол арқылы әйелдер сабырлы, салмақты, өзіне сенімді бола түседі, өз эмоциясын басқара алады. Мен шығармашылық адамдарын жақсы көремін, олардың бәрін өзіме жақын тартып тұрамын. Өзім киім шеберханасында жеті жыл жұмыс істеп, тәжірибе жинақтадым. Сол кездері неге өзімнің сән үйімді ашпасқа деген ой келді. Осылайша, «Сәукеле» сән үйі аштым, жеті жылдан бері жұмыс істеп тұр. Еңбек етуден жалықпаңыздар,- деді Жанна Баймұратова.
Жоба авторы Айжани Нұрланова тігіншілердің әрқайсысымен сөйлесіп, оқу басталғалы өмірлерінде болып жатқан өзгерістер жайлы сұрады. Өз кезегінде қатысушылар екінші тыныстары ашылып, дамуға, өсуге бет алғандарын жеткізіп, алғыстарын білдірді.
Сондай-ақ осы күні Семей қаласының Жұмыспен қамту орталығында жобаның екінші кезеңінің «Бьюти индустрия» бейіндік бағыты бойынша курстан өткен түлектеріне сертификаттар табысталды. Солардың бірі — 39 жастағы көп балалы ана Әсем Түсіпова.
— Мен бес баланың анасымын. 16 жыл бойы декреттік демалыста отырмын. Кірпік өсіру саласымен айналысуды бұрыннан қалап жүргенмін. Осы арманымды жүзеге асыруға көмектескен «Самұрық-Қазына» АҚ компаниясына шынайы алғысымды білдіремін. Сабақ барысында тек кірпік жалғауды емес, мақсат қоюды, күнімізді дұрыс жоспарлауды, бизнес ашудың қыр-сырын меңгердік, психологиялық сабақтар алдық. Өзімізге деген сенімділігіміз артып, жаңа таныстар таптық,- дейді Әсем Түсіпова.
Естеріңізге сала кетейік, «Табысты Отбасы» пилоттық әлеуметтік жобасы 2022 жылдың 1 желтоқсанында Абай, Жетісу, Ұлытау, Түркістан және Ақтөбе облыстарында басталды. «Самұрық-Қазына» АҚ компаниялар тобының бірыңғай қайырымдылық операторы – «Samruk-Kazyna Trust» әлеуметтік жобаларды дамыту қорының кешенді қолдауымен іске асырылуда. Жоба халықтың неғұрлым осал топтарының өкілдерін, оның ішінде көп балалы және аз қамтылған отбасы мүшелерін, жалғыз басты ата- аналарды және ерекше қажеттіліктері бар балаларды тәрбиелеп отырған отбасыларды, табысы төмен отбасылардан шыққан жастарды кешенді оқытуға бағытталған. Оқыту бағдарламасы аясында қатысушылар тігін ісі, автоэлектрик, кондитерлік өнімдер, beauty саласы және әлеуметтік медиа менеджері сияқты бес бейіндік бағыттың бірін таңдай алады. Бейіндік оқытудан бөлек, тәлімгерлік қолдау, жеке тұлғалық даму, бизнес-дағдыларды дамыту бойынша шеберлік сабақтар ұйымдастырылады. Сабақтарға белсенді қатысып, жаттықтырушы мен тәлімгердің барлық талаптарын орындаған қатысушы қажетті құрал-жабдықтарды тегін алады.
«Табысты отбасы» қайырымдылық жобасын іске асыру кезендері туралы ақпарат БАҚ бетінде және @tabysty.otbasy жобасының инстаграм-парақшасында орналастырылады.
