Республика күніне орай Семей қаласындағы Назарбаев Зияткерлік мектебінің ұйымдастыруымен «Ұлт рухы – домбыра үні» атты домбырашылар флешмобы өтті. Қаланың ірі сауда орталықтарының бірінде өткен мерекелік іс-шараға мектептің 100-ге жуық оқушысы қатысты.
Флешмоб аясында зияткерлер «Адай», «Балбырауын», «Нәр ағашы», «Ерке сылқым», «Көрғұлы», «Ертұран» және «Жастар биі» күйлерін орындады. Күмбірлеген күй мен ұлттық әуенге ұласқан өнер көрсетіліміне мектептің би тобы да қатысып, мерекелік бағдарламаның ажарын аша түсті.
— Домбыра – халқымыздың рухани мұрасы, ұлттық болмысымыздың айнасы. Назарбаев Зияткерлік мектептерінде домбыра сабағы 7-сыныпта міндетті пән ретінде оқытылады. Биылғы флешмобқа қатысқан оқушылардың арасында домбыраны алғаш рет үйреніп жүрген жетінші сынып оқушылары да бар. Олар аз уақыттың ішінде күй орындауды меңгеріп, бүгін көпшілік алдында өз өнерлерін көрсетті. Осындай шаралар оқушылардың ұлттық өнерге деген қызығушылығын арттырып, халқымыздың мәдени мұрасына деген құрметін қалыптастырады, – деп атап өтті домбыра пәні мұғалімі Асқар Мұратов.
Айта кетейік, биыл «Назарбаев Зияткерлік мектептері» дербес білім беру ұйымының бастамасымен ұйымдастырылған дәстүрлі флешмоб еліміздің барлық өңірін қамтыды. Республика бойынша 2500-ден астам оқушы мен педагог еліміздің түкпір-түкпірінде домбыра үнін күмбірлетті.
