Балалар мен жасөспірімдер арасында еркін күрестен облыстық ашық біріншілік жалауын көтерген болатын. Аталмыш жарысқа өңіріміздің 80 спортшысы қатысып, боз кілемде өзара мықтыларды анықтады. Сайысқа ШҚО – ның Семей, Өскемен, Риддер қалаларынан және Үржар, Жарма, Бесқарағай, Шемонайха мен Глубокое аудандарының 23 жасқа дейінгі балуандар қатысты.
Жарыстың ашылу салтанатында Семей қаласының дене шынықтыру және спорт бөлімінің басшысы Мұрат Құржықаев және спорт ардагері Сүлейман Чотчаев сөз алып, жастарға жүрекжарды жылы лебіздерін білдірді және ел мерейін асыратын жастарға сенім артатындарын жеткізді.
— Бүгінгі күні ел спортына айрықша көңіл бөлініп келеді. Спортшыларымыз да айтарлықтай жетістіктерге жетіп, Қазақстанның атын әлемге танытуда. Еліміздің болашағы, жас спортшылар, сіздердің қолдарыңызда. Сондықтан байрақты бәскелерде аянбай тер төгіп, еңбек етулеріңіз керек. Бүгінгі жарыста әрқайсысыларыңызға тек жемісті жеңіс тілеймін, — деді спорт бөлімінің басшысы Мұрат Құржықаев.
Боз кілемдегі тартысты белдесулер Дүние-жүзілік күрес федерациясының жаңадан бекіткен ережесіне сәйкес, сегіз салмақ дәрежесінде өткізілді. Ал сайыс қорытындысы бо-йынша іріктелген балуандар алда өтетін ел чемпионатында облыс намысын қорғамақ.
— Қазір дарынды спортшымыз Данияр Қайсанов жаттығу жиындарымен Осетияда жүр. Одан кейін Қазақстан біріншілігіне дайындалады. Сол себепті осы жарыстан босатылып отыр. Сондай-ақ, 55 келі салмақта күресетін мықты спортшылар өте көп. Мәселен, семейлік спортшылар Асхат Сләмханов, Азамат Дәулетбеков сынды балуандарымыз жақсы нәтиже көрсетіп жүр. Жалпы, еркін күрес Шығыс Қазақстан облысының Жарма ауданында жақсы дамыған. Семей қаласы балуандары да ешкімге дес бермей жүр. Бұған қоса Риддер мен Зырян, Катонқарағай спортшылары алдыңғы шепте. Мәселен, өткен жылы Жарма ауданының тумасы Расул Қа-лиев алғаш рет чемпион атанды, — дейді ШҚО жасөспірімдер арасында аға жаттықтырушы Мейірбек Байжанов.
{jcomments on}Өңірде еркін күресті дамыту жолға қойылған. Әсіресе ерлер арасында бұл жұмыс өзінің жемісін беріп жатыр. Биыл аталмыш күреспен айналысамын дегендерге жаңа ережеге сай жаңаша талаптар қойылған.
— 2016 жылы Бразилияның Рио-де-Жанейро қаласында өтетін Олимпиада ойындарына аз ғана уақыт қалды. Сондықтан биылғы жылы лицензиялық жарыстар басталады. Шығыс Қазақстан облысы рейтинг бойынша төртінші орында тұрған Расул Қалиевке зор үміт артады. Спортшы өткен жылы Астана қаласында өткен Азия чемпионатында алтын жүлдегер атанса, одан кейін Кореяның Инчхон қаласындағы Азия ойындарында күміс жүлдегер атанды. Жас спортшыларымыздың Қазақстанның атын әлі талай әлемге танытатынына сенеміз, — дейді аға жаттықтырушы.
Екі күндік сайыс қорытындысы бойынша 50 келіде семейлік Мақсат Шақамаев топ жарса, 57 келіде жармалық Данияр Гульмановқа қарсылас шақ келмеді. Ал 61 келіде жерлес спортшымыз Ерасыл Тұрсағұловтың мерейі үстем болды. 65 келіде бесқарағайлық Амантай Қошқарбаев, 70 келіде Жарма ауданының балуаны Нұрдаулет Дәулетқазыұлының мерейі үстем болды. Ал 74, 84, 97 келі салмақ дәрежелерінде семейдің намысын қорғаған Мейір Көшкінбаев, Ержан Сапарханов пен Әмір Сұлтановтар үздік нәтиже көрсетіп, алтыннан алқа тақты. Енді же-ңімпаз атанған спортшылар Ақтау қаласында өтетін ел чемпионатында ШҚО-ның намысын қорғамақ.
Асан МЫРЗАХАНОВ, «Семей таңы»
