Сәрсенбі күні қалалық ақпарат орталығында Семей қаласы ІІБ әкімшілік полиция бөлімінің әкімшілік тәжірибе бөлімшесінің басшысы, полиция капитаны Қанатбек Ордашев пен Семей қаласы ІІБ тіркеу бөлімшесінің аға автоинспекторы, полиция майоры Дархан Қажиевтің және Семей қаласы ІІБ мемлекеттік тіл және ақпарат бөлімінің жетекшісі Елубек Оспановтың қатысуымен баспасөз мәслихаты өтті.
Баспасөз мәслихаты барысында журналистер жылдың басында өз күшіне енген жол жүру ережелерінің өзгерістеріне қатысты сансыз сауалдарын жолдады. Сөзінің басында Семей қаласы ІІБ әкімшілік полиция бөлімінің әкімшілік тәжірибе бөлімшесінің басшысы, полиция капитаны Қанатбек Ордашев Заңдағы өзгерістер мен толықтыруларға шолу жасап өтті.
— 2015 жылдың 7 қаңтарынан бастап ҚР Әкімшілік Кодексіне бірқатар өзгертулер мен толықтырулардың енгізілгені белгілі. Атап айтатын болсақ, көлік жүргізушісіне салынған айыппұл 7 күннің ішінде төленетін болса, оған 50 пайыздық жеңілдік қарастырылған. Алайда қала көшелеріндегі камера құрылғыларына түскен жағдайда автокөлік иелеріне ешқандай жеңілдік берілмейтінін де айта кеткен жөн. Сонымен қатар барлық автокөліктерге күндізгі уақытта қала ішінде де шамдарын жағып жүру және 3 жастан 12 жас-қа дейінгі балаларды автокөлікпен тасымалдау үшін автокресло қою міндеттелді, — деген Қанатбек Ордашев, — әрине, автокресло төңірегінде әртүрлі қоғамдық пікірлер туындауда. Бұл тұрғыда қазіргі уақытта түсіндіру жұмыстары жүргізілуде. Бірақ мұның жол қауіпсіздігін сақтау үшін маңызы жоғары. Айта кету керек, егер 12 жасқа дейінгі баланың бойы 135 см-ден, ал салмағы 36 келіден жоғары болса, автокреслоға отырмауға құқылы, — деп, атап өтті.
{jcomments on}Тәртіп сақшыларының мәліметінше, өткен жылы 396 жол-көлік оқиғасы тіркелген. Көлік апаты салдарынан 39 адам әртүрлі жарақат алса, 27 адам көз жұмған. Қайтыс болғандардың төртеуі балалар көрінеді. Ал жыл басынан бері 10 жол-көлік оқиғасы тіркеліпті. Оның салдарынан 10 адам жараланса, жаралан-ғандардың біреуі анасының қолындағы балғын. Сондай-ақ, жүргізушілер ішімдік ішіп көлік тізгіндеп, жол сақшыларының назарына іліксе, бірінші жолы көлік жүргізу құқығынан 3 жылға айырылады екен. Ал бұл жағдай бір емес, бірнеше рет қайталанса, істің сотқа жіберілетінін айтады тәртіп сақшылары.
Сонымен қатар құқық қорғау органдарының мамандары ҚР Әкімшілік Кодексіне өзгертулер енгізілуіне сәйкес, Еуразиялық Экономикалық одақ құрамына кіретін Қазақстан, Ресей, Белорусь елдері арасында көлік тасымалдау барысында құжат рәсімдеуде де біршама жеңілдіктердің қарастырыл-ғанын жеткізді. Бұл тұрғыда әзірге тек бір-ақ қиындық бар көрінеді. Мәселен, үш ел арасында құжат рәсімдеуде әзірге ортақ база құрылмағандықтан, автокөлік құжатын растайтын хаттаманы 1 немесе 2 ай күтуге тура келетінін тілге тиек етті мамандар. Алайда бұл мәселенің көп ұзамай бір қалыпқа келетінін айтады.
Нұрдәулет КӘКІШЕВ, «Семей таңы»