Курчатов қаласының әкімі Нұрбол Нұрғалиев жергілікті атқарушы органдар, кәсіпорындар мен ұйымдардың, мекемелердің жұмысымен және олардың қызметкерлерімен танысуды бастады.
{jcomments on}Білім ордаларының жұмысымен танысқан соң Курчатов қаласының әкімі білім ошақтарының бірінші басшыларымен, директорларымен жиналыс өткізді. Жиын барысында оларға нақты тапсырмалар мен міндеттер жүктеді. Нақтырақ айтсақ, материалдық-техникалық базаны нығайта отырып, әрбір білім беру мекемесінің дамуына жол ашатын бағдарламаларды әзірлеп, жоспарлар құруға, Ұлттық бірыңғай тестілеуге қатысушы мектеп бітіруші түлектерді дайындауға күш салуға, ол үшін әр бітірушіге жеке-дара ҰБТ-ға әзірлеу бағдарламасын даярлауға тапсырма берді.
Сонымен қатар қала әкімі мен діни конфессиялардың өкілдері, үкіметтік емес ұйымдар басшыларының кездесуі де өз дәрежесінде өтті. Басқосу барысында үкіметтік емес ұйымдардың маңызы мен міндеті, діни конфессиялар және бейбітшілік пен келісімді сақтау мәселесі және бұл мәселеге, сондай-ақ, қаланың қоғамдық өмірінің дамуына үкіметтік емес ұйымдардың қосар үлесі жайлы айтылып, Мемлекет басшысының «Нұрлы жол – болашаққа бастар жол» атты Жолдауының іске асырылу барысы талқыланды.
Ал Жастар орталығының мүшелерімен жүздесу барысында Нұрбол Жолдаспекұлы мақсаттары айқын жастардың ұйымдарымен жұмыс жасау керектігін тілге тиек етті. Сондай-ақ, «Нұрлы көш» бағдарламасы аясында Курчатовқа қоныстанған 75 азамат қала әкімімен кездесуге келді. Кездесу барысында Нұрбол Жолдасбекұлы қаланың даму деңгейі мен жаңа жұмыс орындарын құру туралы айтып, әлемде орын алып жатқан саяси ахуал жайын көтеріп, Қазақстан Республикасы Президентінің «Нұрлы жол – болашаққа бастар жол» атты Жолдауын іске асыру барысын баяндады.
Өз кезегінде жиынға қатысушылар көкейлерінде жүрген сауалдарын жолдап, ойларымен бөлісіп, ұйымдастырылған кездесулер үшін алғыстарын білдірді. Әкімнің курчатовтықтармен кездесуі енді екі аптаға жоспарланғанын ескерсек, біршама мәселелер талқыланып, жұмыстар барысы айқындалмақ.
Курчатов қаласы әкімінің баспасөз қызметі.