Аягөз қаласының тұрғыны, соғыс және еңбек ардагері Салих Сабильянов ақсақал қаңтар айының 10-шы жұлдызында 95 жасқа толды. Жеңістің 70 жылдық мерекесі қарсаңында тоқсанның төріне шығып, ғасыр құрдасы болып отырған қадірменді қарияны туған күнімен құттықтауға аудан әкімі Бақытжан Байахметов, қала әкімі Руслан Қасымжанов, аудандық ішкі саясат бөлімінің басшысы Роза Қаирбаева ардагердің үйіне арнайы барды.
{jcomments on}Ауданның бірінші басшысы Бақытжан Кәкенқажыұлы қарияның хал-жағдайын сұрап, тұрмыс-тіршілігімен танысты. Ардагерге зор денсаулық, отбасына шаттық пен қуаныш, бақытты да ұзақ ғұмыр тіледі. Торқалы той иесін Алғыс хатпен марапаттап, сый-сияпат көрсетті.
Салих ақсақал болса өзіне құрмет көрсетіп келген аудан басшыларына рахмет айтып, батасын берді. Қадірменді қариямыз — бүгінде өз кіндігінен өрбіген балаларынан немере, немерелерінен шөбере сүйіп отырған бақытты жан. Күні кеше ел басына күн туып, бұлт үйірілген уақытта етігімен су кешкен соғыс ардагері енді соғыс болмаса екен, елім аман, жерім тыныш, халқым, ұрпақтарым аман болса екен деп тілейді.
Б. САЙЛАУБАЙҰЛЫ,
Аягөз ауданы.