Облыс, қала, аудан, кент және ауыл әкімдерінің халықпен жылына екі рет ресми түрде кездесіп, атқарылған жұмыстары жайлы есеп беру туралы Елбасының Жарлығына сәйкес, Үржар ауданының әкімі Серік Зайнулдин бірқатар ауылдарды аралап, кезекті есеп беру жиынын өткізді. Жұртшылықпен жүздесуде аудан басшысы есеп берумен қатар, ауыл тұрғындарының ұсыныстарын тыңдап, көкейлеріндегі сансыз сауалға тұшымды жауаптар қайтарды.
{jcomments on}2015 жылдың 14-29 қаңтар аралығында өтеді деп жоспарланған аудан әкімінің және ауылдық округтер әкімдерінің ауыл тұрғындары алдындағы есепті кездесулері Қоңыршәулі, Шолпан, Қарақол, Алтыншоқы, Жаңа тілек, Жоғарғы Егінсу, Егінсу ауылдарынан басталды. Кездесулерде ауыл әкімдері мен аудан әкімі 2014 жылы атқарылған жұмыстар, алда тұрған міндеттер туралы баяндамаларын жасады.
Кездесулерге аудан әкімі Серік Зайнулдинмен бірге аудандық «Нұр Отан» партиясы филиалы төрағасының бірінші орынбасары Бақтыбай Теңізбайұлы, аудандық ардагерлер кеңесінің төрағасы Нұрланбек Бөлекбайұлы, аудандық жұмыспен қамту және әлеуметтік бағдарламалар бөлімінің басшысы Светлана Семенова, жер қатынастары бөлімінің басшысы Дариға Жаркенова, жұмыспен қамту бөлімінің басшысы Берікқан Абайханұлы, аудандық ІІБ орынбасары Нұрлан Ақашұлы, аудандық білім бөлімі қызметкерлері және БАҚ өкілдері қатысты.
Ауылдардың халқымен жүздесу барысында Серік Зинабекұлы әрбір ауыл әкімінің есебін тыңдағаннан кейін өз баяндамасына тоқталып, халықты толғандырған сұрақтарға толыққанды жауап беруге тырысты.
Есептік баяндамасында аудан басшысы Елбасының «Нұрлы жол – болашаққа бастар жол» атты Жолдауын негізге ала отырып, Жаңа Экономикалық Саясаттың әлемнің ең дамыған 30 елінің қатарына ену жолындағы ауқымды қадам екенін тілге тиек етті. Сонымен қатар елді өркендетуге, әр тұрғынның әл-ауқатын жақсартуға негізделген «Мәңгілік Ел» ұлттық иедеясы арқылы еліміздің және әр қазақстандықтың тағдырының жаңа қыры, көрінісі айқындалғандығын да атап өтті.
— Жолдау әрбір адамның ертеңгі күніне үлкен сенім ұялатады. Қазақстан 23 жылдың ішінде қоғам өмірінің барлық саласында жаңартуды өте жоғары деңгейде жүргізді. Егемен еліміз алған биіктер мен табыстар ұлтаралық татулық, өзара келісім мен бірліктің арқасында келіп отырғанын жастардың ойына сіңіру керектігі туралы пікірі де көптің көңілінен шықты. Бүгін еліміз бағыт ұстап отырған «Мәңгілік Ел» болудың нұрлы жолында барша қазақстандықтар жұмылған жұдырықтай қимылдап, ортақ Отанымыздың гүлденуіне үлес қосуы керек деуі де орынды. Болашақ жастардың қолында екені белгілі. Жолдауда аға буынның қолымен жасалған құндылықтарды көздің қарашығындай сақтау қажеттігіне маңыз берілді. Алда атап өтілетін Қазақстан Республикасы Конституциясының, Қазақстан халқы Ассамблеясының 20 жылдығы, Жеңістің 70 жылдығы, Қазақстан мемлекеттілігінің түпқазығы – Қазақ хандығының 550 жылдығы сияқты мерекелерді қазақстандық патриотизмді қалыптастыру бағытында ұйымдастыру туралы Мемлекет басшысының ойлары да ұтымды, — дей келе, аудан ахуалына тоқталды.
Алдымен ауыл шаруашылығына мән беріп, оның ішінде облыс әкімі Даниал Ахметовтің тапсырмасы бойынша Жаңа тілек, Үржар, Мақаншы ауылдарынан сүт дайындау пункттері ашылатындығын жеткізді. Өнеркәсіп, құрылыс, тұрғын үй, коммуналдық шаруашылық, кәсіпкерлік, бюджет, білім беру, денсаулық сақтау, санитарлық-эпидемиологиялық жағдайға, әлеуметтік қорғау, жұмыспен қамту, мәдениет, спорт, байланыс салаларына, құқық бұзушылық пен демографиялық жағдайға және 2015 жылға арналған міндеттерге кеңінен тоқталды.
Кездесу барысында жиынға қатысушы ауыл тұрғындары сауалдарын жолдады. Тұрғындар тарапынан жолданған сауалдардың дені ауыз су және жол мәселесі тұрғысында болды. Әр сауалға тұшымды жауап қайтарған Серік Зайнулдин бұл істердің түйіні кезең-кезеңімен, рет-ретімен шешілетіндігін айтты.
Серік Зинабекұлымен кездесу кезінде көпшілік қауым аудан орталығы мен ауылдардың ажарланып келе жатқандығын, тұралап қалған сақалды құрылыстардың азайғандығын, әр істе ілгерілеушіліктің бар екенін айтып, аудан басшысына шексіз алғыстарын жеткізді.
Алғашқы кездесулер барысы осылай өтті. Алдағы уақытта, қаңтардың соңғы күндеріне дейін, аудан басшысы өзге ауылдарды аралап, халықпен кездесуі жалғасатын болады.
Бауыржан ЖАҚЫП,
«Семей таңы»
