Айнабұлақ ауылдық округінің аумағындағы «Қадиша» қыстағындағы тіршілік тынысы ауыл өмірінің айшықты келбетін әйгілеп тұрғандай. Дарқан дала төскейіндегі еңбек әуені күнделікті толастамайды. Таңмен таласа тәтті ұйқыларынан оянатын азаматтар төрт түліктің төресі – ірі қара малдарын бағып-күтуді өз жауапкершіліктеріне алған.
{jcomments on}Мұнда тәжірибелі мал маманы, Айнабұлақ ауылының тумасы, туған жерінің өсіп-өркендеуіне өз еңбегімен сүбелі үлес қосып жүрген, жерлестерінің мақтанышы Ризабек Шәкенұлы басқаратын «Шәкен» шаруа қожалығы тауарлы сүт фермасын құрып, мақсатты істерін жүзеге асыруда.
— Ауылда туып өскендіктен бала кезімізден бастап мал шаруашылығының қыры мен сырын біліп есейдік. Кішкентай кезімізде үйге көмектесуді бұзау бағудан бастағанымыз есімізде. Отбасында 13 бала болдық. Шаруашылықтың жүргізушісі болған әкеміз, әртүрлі шаруаларды атқарған анамыз бізді еңбекке баулыды. Үйдегі меншік малдың үлкен-кішісінің күтімі балалардың еншісіне тиетін. Бәлкім, соның да нәтижесі болар, еңбек жолымыз өзіміз өскен ауылдан басталды. Елбасы жыл сайынғы дәстүрлі Жолдауларында экономиканың алтын қазығы саналатын ауылды дамытуға, онда ауылшаруашылығы саласын өркендетуге қолдау көрсетіп, арнайы міндеттер жүктеп келеді. Менің мыңдаған әріптестерім оған куәгер болуда. Мемлекеттік бағдарламалар аясында несиеге қол жеткізіп, қалаған кәсіптерін ашып, өз тіршіліктерін өркендетуде. Мен де солардың бірімін. Мемлекет басшысының «Нұрлы жол – болашаққа бастар жол» атты Жолдауында да тауарлы сүт фермасын ашу туралы нақты тапсырмалар атап айтылған. Соған нақты іспен жауап берудің қамына кірістім. Аудандағы сүт зауытына күнделікті сүт өнімдерін өткізу – жоспарымдағы шаруаның бірі, — дейді шаруа қожалығының басшысы Ризабек Ыдырышев.
Ол бүгінгі күні екі түрлі тұқымды сүт бағытындағы сиырларды республиканың әр аймағынан сатып алып, өткен жылы 50 басқа арналған тауарлы сүт фермасын ашты. Қыс айларында сиырлар тұратын, талғамға сай жаңа қора салды. Бүгінде қарамағындағы ірі қараның алғашқы төлдерін қабылдап алып, бұзауларды да ерекше күтімге алған. Бұл істе атажұртқа оралған қандастарымыз Сұлубай Уәлихан, Әсетбек Қастер мал күтімін өз жауапкершіліктеріне алған. Күнделікті күтімде тұрған сиырларға бірнеше уақыт жемі мен шөбін, құнарлы азықтарын дайындап береді. Шөпті турайтын техника да солардың жауапкершілігіне бекіген. Отаналары сиыр саууда өз еңбекқорлықтарын көрсетуде. Сонымен қатар аталмыш қыстақта ет бағытындағы ірі қара да өсірілуде.
Жақында Зайсан ауданында арнайы іссапармен болған Шығыс Қазақстан облысы әкімінің орынбасары Жақсылық Омар тауарлы сүт фермасына ат басын бұрып, оның тынысымен арнайы танысқан болатын.
Ардақты БӨЛДЕКБАЙ,
«Семей таңы»
