«Кешегі күннен алыс жоқ, ертеңгі күннен жақын жоқ» деген халық даналығы. Ендеше, жер емшегін емген диқандар үшін алдағы көктемгі дала жұмыстарының күн өткен сайын жақындай түсетіні даусыз. «Қамданған қапы қалмайды» демекші, Тарбағатай ауданының әкімі Ділдабек Оразбаевтың бастамасымен көктемгі егіске дайындық жұмыстарының барысы күн тәртібіне биыл да ерте қойылып отыр. Осы мәселеге байланысты алқалы жиын өткен аптада Ақсуат өлкесіндегі диқаншы қауымның басын біріктіріп өтіп еді, дәл сондай басқосу таяуда Ақжар ауылында ұйымдастырылды.
{jcomments on}Егістік жұмысына ерте қамдану мәселелері жан-жақты сөз болған жиында Ақжар өлкесі ауылдық округтерінің әкімдері хабарлама жасап, ауыл өмірінің бүгінгі тыныс-тіршілігін, егіншілік саласында қалыптасқан дәстүрлерін баяндады. Ақжар жақта да егістік көлемін арттыру, егіншілік мәдениетін жетілдіру, осы салаға инновациялық технологияны енгізу, атап айтқанда, топырақты өңдеп, аудандастырылған тұқым қорын жасап, тамшылатып суаруды қолға алу мәселелері қарастырыла бастаған. Мысалы, Ақжар ауылының әкімі Асқар Боғырбаев ауыл диқандары былтыр 1070 гектар суармалы жерді игерсе, биыл егістіктің көлемін 1245 гектарға арттыру көзделіп отырғанын айтты. Мұндағы биылғы бір жаңалық — картоппен қатар соя, күнбағыс сияқты майлы дақылдар көлемі артып, 70 гектар картоп, бау-бақша егістігіне мол өнім алудың бірден бір жолы — тамшылатып суару әдісін қолдану мақсаты белгіленіпті.
Диқандармен болған жиынды аудан әкімі Ділдабек Тәжібайұлы қорытындылады. Өз сөзінде аудан басшысы Ақсуат аймағына қарағанда Ақжар өңірі егіншілерінің көктем егісіне қажетті сапалы тұқымды сенімді әзірлеп алуы жақсылықтың нышаны екенін айтты. Ауданды әлеуметтік — экономикалық жағынан дамытудың кілті егіншілікті дамытуда екеніне нақты мысалдар келтірген аудан басшысы шарушылық басшыларын, диқандарды суармалы жерді барынша тиімді пайдаланып, өнімді молайту үшін ғылыми –зерттеу институттарымен тығыз ынтымақта жұмыс жасауға шақырды. Егістікке қажетінше тыңайтқыш беру, Шерімбай су жүйесі аймағындағы жерді тиімді пайдалану, тамшылатып суару әдісін меңгерген мамандар даярлау, егіншілікке байланысты субсидияны шаруаларға соңғы өнім нәтижелеріне байланысты беру мәселелеріне тоқталды.
Хамза СӘТИЕВ,
«Семей таңы»
