Semeytany.kz – Абай облысында “Қуатты өңірлік ғылым – қуатты өңір” атты ғылыми-практикалық конференция өтті. Жиынды облыс әкімінің орынбасары Қуаныш Сүлейменов ашып, өңірлік ғылымның ел дамуына қосар үлесіне тоқталды.
– Өңірлік ғылымның дамуы – тек мамандар үшін емес, тұтас қоғам үшін маңызды. Абай облысы ғылымды, білім мен технологияны қолдауға әрдайым ашық. Бұл кездесуден нақты ұсыныстар мен жаңа идеялар туындайды деп сенемін, – деді әкім орынбасары.
Конференция барысында ядролық энергетика, цифрлық трансформация, ғылымның болашағы мен кадр даярлау мәселелері кеңінен талқыланды. Шараға мемлекеттік органдар, ғылыми қауымдастық өкілдері және сарапшылар қатысты.
Шәкәрім университетінің халықаралық байланыс және инновациялар жөніндегі проректоры Ерасыл Дулатбай “Аймақтық ауыл шаруашылығы үшін ғылым: университеттік технологиялар – деректерден шешімдерге дейін” тақырыбында баяндама жасады.
– Ауыл шаруашылығын ғылыммен жаңғыртпай, тұрақты экономиканы елестету қиын. Шәкәрім университеті агросекторға арналған цифрлық шешімдер мен инновациялық жобалар әзірлеуде. Ғылым мен өндірістің байланысы өңірлік аграрлық саясаттың негізіне айналуы тиіс, – деді ол.
Конференция соңында қатысушылар ашық пікір алмасып, әр саладан келген мамандар өз ұсыныстарын ортаға салды.
