Өткен бейсенбі күні Екпін ауылында әлеуметтік мәні зор тағы бір қуанышты шараның куәсі болдық. Ауылда былтыр ғана 50 балаға арналып ашылған жеке меншік «Балбөбек» балалар бақшасы биыл тағы 20 орынға кеңейтіліп, жаңа бөлім қосылып, ауыл тұрғындарын қуанышқа бөледі. Осы балалар бақшасын өз қаражатымен жабдықтап, оның қалыпты жағдайда жұмыс істеуіне барлық жағдай жасаған белгілі кәсіпкер Болат Қойбағаров ауылын көркейту жолында аянып қалмайтынын тағы да дәлелдеді.
{jcomments on}«Балбөбектің» кеңейтілуіне арналған салтанатқа Тарбағатай ауданының әкімі Ділдабек Оразбаев келіп қатысып, құттықтау сөз сөйледі. Өз сөзінде аудан басшысы Елбасының тікелей бастамасымен жұмыс істей бастаған «Балапан» бағдарламасының негізгі мақсаты білім беру жүйесінің ұзақ мерзімді жоспарына сай, мектеп жасына дейінгі кішкентай бүлдіршіндердің жасына байланысты даму ерекшеліктеріне қарай тәрбие мен жүйелі білім алуын қамтамасыз ету екенін айта келіп, бұл салада Тарбағатай ауданында мақсатты жұмыстар атқарылғанына тоқталды. Мысалы, ауданда соңғы бір жарым жыл ішінде ғана балалар бақшасының саны 7-ден 19-ға дейін көбейген екен.
Қуанышты шарада сонымен қатар Екпін ауылы ардагерлер алқасының төрағасы Жамбыл Ахметқалиев, шөбересін балабақшаға жетелеп әкелген Маржамила апа, ауыл әкімі Бейбіт Сербатыров, аудандық «Тарбағатай» газетінің редакторы Ерғали Жұмаханов, қарт ұстаз Молдабек Мойтықов және басқалар жақсы тілектерін айтып, осы игілікті іске бастамашы болған аудан басшысына, көптің тілегін қолдап, қолында бар мүмкіндіктерді елге пайдасы тиетін шаруаларға жұмсап отырған Б.Қойбағаровқа алғыс сезімдерін білдірді.
Хамза СӘТИЕВ,
«Семей таңы»
