Semeytany.kz – Абай облысында қаржы пирамидаларына қарсы күрес шеңберінде 558 сайт пен чаттың жұмысы тоқтатылды. Бұл туралы Өңірлік коммуникациялар қызметінде өткен баспасөз мәслихатында Экономикалық тергеп-тексеру департаменті басшысының орынбасары Ғалым Шегенов мәлімдеді.
Құқық қорғау органдары мен департаменттің бірлескен жұмысы нәтижесінде 14 қаржы пирамидасын ұйымдастырған және олардың қызметін жарнамалаған тұлғалар жауапкершілікке тартылған.
– Аталған істер бойынша 1 500-ден астам азамат қаржы пирамидаларының құрбаны болды. Жалпы келтірілген материалдық шығын 115 миллион теңгеден асты. Тергеу барысында 39,1 миллион теңгеге бағаланған мүлікке тыйым салынды. Қазіргі таңда 33,1 миллион теңге зардап шеккендерге қайтарылды, – деді Ғалым Шегенов.
Департамент өкілі Qvasar, Magis, Bitline, Eolus, Chiatai, LiveGood, JDL, Asar Baspana, Vip International, El Quaty, Boxy Wealth, Q-net, «Рахат 0425» және «Дари Получай» сынды жобалардың жолы кесілгенін айтты.
Соңғы уақытта қаржы пирамидалары азаматтардың қаражатын криптовалюта арқылы жинау тәсілін жиі қолдана бастаған. Бұл – табысты жасырудың жаңа әдісі ретінде бағаланып отыр.
– Қаржы пирамидасының белгілері – жоғары табысқа уәде беру, нақты өнімнің болмауы, жаңа салымшыларды тарту, түсініксіз шарттар мен лицензияның жоқтығы. Мұндай жобалар әлеуметтік желі, мессенджерлер және жеке ықпалды тұлғалар арқылы жылдам таралады, – деді ведомство өкілі.
Аймақта 2023 жылдан бері «Кибербақылау» жүйесі арқылы анықталған 558 интернет-ресурстың жұмысы тоқтатылған.
Мамандар тұрғындарды қаржы пирамидаларының белгілерін ерте тануға шақырып, күмәнді жобалар туралы Қаржылық мониторинг агенттігінің 1458 нөміріне немесе AFM Insider чат-боты арқылы хабарлауға кеңес береді.
