Семей қаласының санитарлық авиация қызметі үшін жағымды жаңалық орын алды. Сала мамандарының жұмыс нәтижелілігін арттыру, жетуі қиын жерлердегі азаматтарға шұғыл медициналық көмек көрсету мақсатында ҚР Денсаулық сақтау және әлеуметтік даму министрлігінің қолдауымен АН-2 маркалы ұшағы берілді.
{jcomments on}Ұшақ Тараздың «Тараз Жаңа Әлем» компаниясынан жеткізілген. Енді Семей қаласынан шалғайдағы Абыралы өңірі, Абай, Бородулиха, Бесқарағай аудандары, Шар, Курчатов сынды қалалардың жедел медициналық көмекке зәру тұрғындары жедел түрде қалаға жеткізілетін болады.
Айта кетерлігі, ұшаққа дейін Семей қаласының санитарлық авиация қызметі мамандарына өткен жылдың сәуір айында тікұшақ берілген. Алайда 3 ай уақыттан кейін тікұшақ кері қайтарылған екен. Әуе көлігі семейліктерге қызмет еткен қысқа мерзімді уақыт аралығында санавиация мамандары нәтижелі жұмыс көрсеткішін байқатқан.
— Тікұшақ берілген уақыт аралығында 41 рет әуеге көтеріліп, оның ішінде 39 науқасты қаладағы онкологиялық, кардиологиялық орталыққа, перзентханаларға жеткізіп, медициналық көмек көрсетуге мүмкіндік жасадық. Үш ай уақыт аралығында сонша адамға көмек көрсету өте жақсы көрсеткіш деп ойлаймыз,- дейді Семей қаласы санитарлық авиациясының меңгерушісі Нажия Пронина.
Жалпы, санитарлық авиация басы ауырып, балтыры сыздаған жандардың барлығына емес, жүкті әйелдер, балалар, жүрек, инсульт алған науқастарға, жол — көлік оқиғасына тап болған адамдарға қызмет етеді. Оларға қаладағы білікті мамандармен жасалған келісімшарт негізінде медициналық мекемелерде тиісті жәрдемдер беріледі. Жаңа ұшақ әзірге халыққа көмек көрсету үшін әуеге көтерілген жоқ. Қазіргі таңда ұшақты медициналық жабдықтармен қамтамасыз ету ісі жүргізіліп жатыр. Санитарлық авиация басшылығының айтуынша, тікұшақпен салыстырғанда, ұшақтың мүмкіндігі мол. Уақыт үнемдеу жағынан да, дәрігерлер мен науқастарға арналған орындар санынан да ұтымды. Санавиация меңгерушісінің пікіріне сүйенсек, егер қызмет мамандары жемісті жұмыс жасаса, жоғарыда аталған аудандардан өзге, шалғайдағы аудандарға да қол ұшын созу ҚР Денсаулық сақтау және әлеуметтік даму министрлігі тарапынан жүктелуі бек мүмкін. Бұл тек халыққа тиімді болмақ. Қалай десек те, барлық жағдай қазақстандықтардың игілігі үшін жүзеге асырылып жатыр. Мемлекет басшысы тұрғындардың жасын 80 жасқа дейін арттыру қажеттігін, ол үшін алғашқы медициналық-санитарлық көмек, санитарлық авиация саласын дамытуға тапсырма берген. Жаңа ұшақ Елбасымыздың халық денсауылығын жақсарту бойынша берген тапсырмаларына сәйкес атқарылып жатқан жұмыстарының нәтижесі деуге болады.
Әйгерім СӘРСЕНҒАЛИ,
«Семей таңы»
