Semeytany.kz – Облыс әкімі Берік Уәли Бесқарағай ауданына жұмыс сапары барысында Канонерка ауылындағы Мәдениет үйінің жағдайымен танысып, нысанға жөндеу жұмыстарын жүргізу қажет екенін атап өтті.
1957 жылы салынған мәдени нысанда 80 орындық концерт залы, кітапхана және хореографиялық зал орналасқан. Қазіргі таңда мұнда алты адам еңбек етеді. Алайда соңғы жылдары шатырынан су ағу мәселесі туындап, ғимараттың ішкі бөлігіне айтарлықтай зиян келген.
2023 жылы «Ауыл – ел бесігі» бағдарламасы аясында шатырға күрделі жөндеу жүргізілгенімен, жұмыстар жауын-шашын кезінде орындалып, ішкі қабырғалар мен төбеге зақым тиген. Осыған байланысты ғимаратқа ағымдағы жөндеу жүргізу – өзекті мәселе болып отыр.
Жоспар бойынша:
-
еден мен терезелер ауыстырылады,
-
жылу және су жүйелері жаңартылады,
-
электр желісі қалпына келтіріледі.
Бұл бағытта жобалық-сметалық құжаттама дайындалып, облыстық Мәдениет басқармасына ұсынылған.
Аймақ басшысы ауыл мәдениетін дамыту – ауыл тұрғындарының әлеуметтік өмірінің ажырамас бөлігі екенін атап өтті.
– Биыл Бесқарағай ауданында бірқатар әлеуметтік нысандарды пайдалануға береміз. Канонерка ауылындағы Мәдениет үйі де назардан тыс қалмайды. Бұл нысанды жөндеуге қолдау көрсетеміз, – деді Берік Уәли.
