Мәуліт – Алла тағаланың ең сүйікті пендесі, хазіреті Мұхаммедтің (с.ғ.с.) дүниеге келген айына атау етіп қойылғандықтан, барша мұсылман қауым Мәулітті құрмет тұтады, барлық жерде Мәуліт қағидасы, өлеңдері оқылып, расулуллаһ еске алынады. Имандылық үйлерінде Құран Кәрімнен сүрелер оқылып, хадистер тыңдалады, уағыздар айтылады.
{jcomments on}Жексенбі күні Семей қалалық мәдениет сарайында қаламыздың мұсылман жамағаты Алла Тағаланың барша адамзатқа жіберген соңғы пайғамбары, адамзаттың ардақтысы, сүйікті пайғамбарымыз Мұхаммедтің (с.ғ.с) дүниеге келген күні — Мәуліт мейрамын кеңінен атап өтті. Бұл күні мәдениет сара-йында өткен маңызды мерекеге қала жұртшылығы молынан жиналды.
Еліміздің тұтастығы мен халықтың бірлігі үшін дұға жасалған қасиетті мерекені Қазақстан мұсылмандары Діни басқармасының Семей өңірі бойынша өкіл имамы Мақсат қажы Алтыбай ашты. Ал кешке арнайы қатысқан қала әкімі Айбек Кәрімов жерлестерімізді күллі мұсылман қауымының ұлық мерекесімен құттықтады. Айбек Мүталапханұлы еліміздің ауызбіршілігін сақтап, адами құндылықтарымызды насихаттауда, жастарымызды рухани тұрғыдан түлетуде Ислам дінінің алатын орны зор екенін атап өтті.
Мерекелік кеш барысында Пайғамбарымыздың хадистерінен үзінділер оқылып, мысал әңгімелер айтылды. Әрбір мұсылманды зиялылық пен тектілік, адалдық пен адамгершілікке шақыратын уағыздар тыңдалды. Мереке барысында мәдениет үйінің өнерпаздары өнер көрсетсе, «Дариға-ай» жастар театры әртістерінің тағылымға толы қойылымы ұсынылды.
— Мәуліт — мұсылман үмметі үшін мерейлі ғажап мереке. Сүйікті Пайғамбарымыздың өмірбаяны, асыл дінімізді адамдардың жүрегіне жеткізудегі даналығы, қажыр-қайраты — күллі мұсылман үшін өмірлік өнеге. Мәуліт мерекесі мұсылмандардың бір-біріне деген бауырмалдылығын, құрметін, сүйіспеншілігін арттырады. Бауырмалдылық, бірлік, имандылық болмаған жерде өсіп-өркендеу де болмайды. Оны төңірегімізде болып жатқан түрлі оқиғалардан көріп, біліп отырмыз. Бірлігіміз бекем болсын, осындай мұсылман қауымын ізгілікке шақыратын Мәуліт мерекесі құтты болсын, — деген Семей қаласының әкімі Айбек Кәрімов мерекенің мазмұнын байытып, мәнін аша түскен қаламыздың өнерпаздарына зор ризашылығын білдірді.
Ғибрат пен өсиетке толы кеш барысында «Дариға-ай» жастар театры өнерпаздарының көрініс ретінде қойған ғибратты оқиғалары көрермен көңіліне үлкен ой салып, ерекше әсерге бөледі. Ал Семей қаласы мешіттері имамдарының айтқан Мәуліт салауаттары мен мадақтары жиналған жұрттың жүрегіне жол тапты. Қалалық мәдениет үйі әртістері айтқан діни әндері, термелері, ұлтымыздың патриоттық әндері мерекенің әрін кіргізіп, жиналған көрермендерді қуанышқа бөледі.
Игі шара соңында ҚМДБ-ның Семей өңірі бойынша өкіл имамы Мақсат қажы Алтыбай мерекені өткізуге үнемі қолдау көрсетіп, өз үлесін қосып жүрген қала әкімі Айбек Мүталапханұлын, сонымен қатар «Дариға-ай» театрын, «Ислам Нұры» газетінің редакторы Дәулет қажы Тілеубердиевті, дініміздің насихатталуына қалам тербеп, әртүрлі мақалаларын мерзімді баспасөз бетінде жариялап жүрген Меруерт Мұхамадиеваны, қалаға қарасты Бұйғылы елдімекенінің имамы, тоғыз баланың әкесі Тоқтар Майқыұлын Алғыс хатпен марапаттап, сыйлықтар табыс етті. Сонымен қатар өкіл имам дініміздің жанашыры болып, қолдау білдірген қала, аудан имамдарына және бірқатар кәсіпкер азаматтарға шынайы ризашылығын білдіріп, алғысын жеткізді. Осылайша, қаламызда өткен Мәуліт мерекесі талай жүрекке жылу, көңілге иман, рухани азық сыйлады.
Асан МЫРЗАХАНОВ,
«Семей таңы»