Semeytany.kz – Бүгін облыс әкімі Берік Уәли Семей қаласындағы тазалық, су құбыры және жол жөндеу бағытындағы жұмыстармен танысты. Таңғы сағат 7-де аймақ басшысы Қаржаубайұлы даңғылында жолдарға су себу жұмыстарын бақылап көрді.
Қала әкімінің міндетін атқарушы Бекжан Бапышевтың айтуынша, қазіргі таңда Семей қаласындағы негізгі көшелерге күніне үш мәрте су себіледі. Бұл жұмысқа 20-ға жуық арнайы техника жұмылдырылған. Облыс әкімі бұл жұмыстың маңызын атап өтіп, техника санын арттыруды тапсырды.
Сапар барысында аймақ басшысы Нахаловка кентіндегі ауыз су құбырын тарту жұмыстарының барысымен де танысты. Қазіргі уақытта 4,5 шақырым магистральдық құбыр төселіп, 100-ден астам құдық орнатылған. Жоба аясында барлығы 6 шақырым магистральдық желі және 10 шақырым абоненттік желі салынады. Бұл жоба 8 көшедегі 374 үйді таза ауыз сумен қамтамасыз етуге бағытталған.
Мердігер ұйым өкілдерінің айтуынша, ауыз су тарту жұмыстары бір ай ішінде аяқталады. Бұған дейін бұл аумақта тұрғын үйлер ауыз су жүйесіне қосылмаған.
– Мердігер компания жұмысты мерзімінен бұрын аяқтауға уәде беріп отыр. Алайда ең бастысы – жұмыстың сапасы. Семейдің шеткері аймақтарын сумен қамту – өте өзекті мәселе. Бұл жұмысты жеке бақылауыма аламын, – деді Берік Уәли.
Қазіргі таңда Семей қаласында ауыз сумен қамтуға қатысты 6 жоба қатар жүзеге асырылып жатыр.
